Quèst l’è un fat suzès,
na me séndic d’adès,
mo ma quèl ch’u jèra prima,
per e’ quèl ò tènta stima.
Quand a l’ò vést a pid,
am sò šbigulè de rid,
ò dét: fórse l’impèra,
a puzè i pid ma tèra.
E pu a lèz sla Gazèta,
de fúrt dla biciclèta,
mè ò dét : un va béin,
frighè e’ prìm zitadèin!
S’im la cèva mu mè,
a biastìm, mo lai pò stè,
im n’à zà frighè tènti,
um täca stè pjó atènti.
Ma ló l’è un ènt chèš,
j gl’ja fata säta e’ nèš,
se quèst l’è sicurèza,
per i lèdre l’è ‘na blèza.
Quèl che duvria badè,
u s’è fat sòbti frighè,
fórse mè am sbajarò,
i lèdre i fa quèl ch’i vò.
Pèrò u n’è gióst,
si frèga l’Èrc d’ Augóst,
dop e’ séndic cus ch’e’diš?
Che s’un gnè l’è preciš!
I lèdre i n’à paura,
e la vòlta ch’it la zura,
l’è sicur ch’it la fà,
cume e’ séndic fórse e’ sa.
E che lò um permèta:
se e’ diš d’andè in biciclèta,
ènca i lèdre dòp i pròva,
e i tò só quèla ch’i tròva.
Mo se e’ gés d’andé a pid,
i lèdre i saria sèrvid,
i frigaria, us pò scumèt,
prima al schèrpi e pu i calzét.
Ivano Aurelio Muratori
RUBATA LA BICICLETTA DEL SINDACO
Questo è un fatto accaduto,/ non al sindaco di adesso,/ ma a quello che c’era prima,/ per il quale ho tanta stima.
Quando l’ho visto a piedi,/ mi sono sbellicato dal ridere,/ ho detto: forse impara,/ ad appoggiare i piedi per terra.
E poi leggo sulla Gazzetta,/ del furto della bicicletta,/ io ho detto: non va bene,/ fregare il primo cittadino!
Se la fregano a me,/ bestemmio, ma ci può stare,/ me ne hanno fregate tante,/ mi tocca stare più attento.
Ma lui è un altro caso,/ gliel’hanno fatta sotto il naso,/ se questa è sicurezza,/ per i ladri è una bellezza.
Quello che dovrebbe badare,/ si è fatto subito fregare!/ forse io mi sbaglierò,/ i ladri fanno quello che vogliono.
Però non è giusto,/ se fregano l’Arco d’Augusto,/ dopo il sindaco cosa dice?/ Che se non c’è è uguale!
I ladri non hanno paura,/ e la vòlta che te la giurano,/ è sicuro che te la fanno,/ come il sindaco forse sa.
E che lui mi permetta:/ se dice di andare in bicicletta,/ anche i ladri dopo provano,/ e prendon su quella che trovano.
Ma se dicesse di andare a piedi,/ i ladri sarebbero serviti,/ fregherebbero, si può scommettere,/ prima le scarpe e poi le calze.
