Èc arvata la calura,
a sém tótt sla lèngua fura,
a mól tna póza ad sudór,
e a gém grazie me Signór.
Ènca se e’ chèld l’è tènt,
us täca èss cuntèint,
che se e’ tèimp e’ bòta mèl,
u s’afòga ad tèmpurèl.
E’ chèld per quant che sia,
us pò dumè tótavia,
us fà crès e’ pél sla pèla,
ènziché da spès rašèla.
E fè cumè e’ camèl,
ch’l’à pjó pil de pnèl,
e’ stà säta e’ sóliòun,
sèinza vèrz l’umbrilòun.
Avémie e pél ènca nun,
quand a sèrmie di simiùn,
te béin stè dal cavèrni,
d’instèda e d’invèrni.
Un s’à d’avè paura,
d’aturnè ma la natura,
fé crès e’ pél du ch’l’éra,
quand ch’a sém arvàt sla tèra.
Perché l’òm béin plóš,
cumè e’ baghin spinóš,
e’ pò stè me sól di dé,
sèinza rès-ce da brušè
Ènca la dòna barbuda,
me sól las po’ mèt nuda,
quèrta da ‘na masa ad pél,
lan sèint né chèld e né zél.
Di sugétt cunzèd isé,
in va a spas o a lavurè,
bšägna èmènc ch’is vésta,
in sta miga tla furèsta.
Quand ch’jà só ‘na maja,
calzun, capel d paja,
tótt quant béin radanèd,
e’ pél e’ rèsta mašèd.
Ivano Aurelio Muratori
CI VUOLE IL PELO PER IL CALDO
Ecco arrivata la calura,/ siamo tutti con la lingua fuori,/ a bagno in una pozza di sudore,/ e diciamo grazie al Signore.
Anche se il caldo è tanto,/ ci tocca essere contenti,/ che se il tempo butta male,/ ci affoga di temporali.
Il caldo per quanto sia,/ si può domare tuttavia,/ si fa crescere il pelo sulla pelle,/ anzi che spesso rasarla.
E fare come il cammello,/ che ha più peli del pennello,/ sta sotto il solleone,/ senza aprire l’ombrellone.
Avevamo il pelo anche noi,/ quando eravamo degli scimmioni,/ nel ben stare delle caverne,/ d’estate e d’inverno.
Non si deve avere paura,/ di tornare alla natura,/ far crescere il pelo dov’era,/ quando siamo arrivati sulla terra.
Perché l’uomo ben peloso,/ come l’istrice,/ può stare al sole dei giorni,/ senza rischio di bruciare.
Anche la donna barbuta,/ al sole si può mettere nuda,/ coperta da tanto pelo,/ non sente né caldo e né gelo.
Dei soggetti conciati così,/ non vanno a spasso o a lavorare,/ bisogna almeno che si vestano,/ non stanno mica nella foresta.
Quando hanno su una maglia,/ calzoni, cappello di paglia,/ tutto quanto ben sistemato,/ il pelo rimane nascosto.
