A fèin dla vita us sa,
ch’us täca pasè d là,
tótt avém la stèsa sòrta,
un si scapa da la mòrta.
Com e quand purtès via,
lal dècid sèimpre léa,
du ch’ las pòrta la ne diš,
a immaziném té paradìš.
A lasém sa pòca chèra,
al nòst’ òsi säta tèra,
custudidi té camsènt,
daquèdi cun e’ piènt.
Fat da ch’i u s’à vlù bèin,
e che incóra dòp dla fèin,
u se vèin a dì säta vóša,
sla tamba, dré la cròša.
Du che agl’jòsi al rèstèrà,
per tòt l’ètèrnità,
ilé a dispusiziòun,
per rizèv agl’juraziòun.
Isé che òz mè a pòrt,
un fiòr per i mi mèrt,
in réquiem te camsènt,
mo viv int la mi mèint.
Ivano Aurelio Muratori
PER I MORTI!
A fine vita si sa,/ che ci tocca passar di là,/tutti abbiamo la stessa sorte,/ non si scappa dalla morte.
Come e quando portarci via,/ lo decide sempre lei,/ dove ci porta non lo dice,/ immaginiamo in paradiso.
Lasciamo con poco piacere,/ le nostre ossa sotto terra,/ custodite nel camposanto,/ annaffiate col pianto.
Fatto da chi ci ha voluto bene,/ e che ancora dopo la fine,/ ce lo viene a dire sottovoce,/ sulla tomba, vicino alla croce.
Dove le ossa resteranno,/ per tutta l’eternità,/ lì a disposizione,/ per ricevere una orazione.
Così che oggi io porto,/ un fiore per i miei morti,/ in requiem nel camposanto,/ ma vivi nella mia mente.
