L’éra scrét te lunèri:
maz sal ròši e rušèri.
A mità dla primavéra,
us scapéva zà la séra.
J òmne, i prim a cór via,
per fè tapa tl ustèria,
a zughè, a bé e’ vèin,
e a màgnè dó tré luvèin.
I burdèll dré mal burdèli,
dré mal lózli e mal zghèli,
jarturnéva pu mal chèši,
pin d’amànduli e zaréši.
I scapèva i bèi ragaz,
in amór te mèš ad maz,
per fè dòlzi sèrènèdi,
mal burdèli inamurèdi.
Al dunini, a ‘na zèrt óra,
meda l’ós al vniva fóra,
per aviè-s in cumpagnia,
a prighè te mèš d Maria.
Tla ciša per e’ rušèrie,
cun e’ prét te prešbitérie,
a dì: Pater, Ave e Gloria,
sna länga giaculatòria.
D’indré, pièn pianèin,
al guardèva mi zardèin,
stupidi da tènti ròši,
a dì pòc maravigliòši.
Läng la strèda a e’ cèr d luna,
dògnitènt in cujèva una,
e tót lóri durènt e’ viaz,
i n’armidièva un maz.
Al cridéva da par sè,
che coj i fiur un fós pché,
ch’e’ fós ènzi un òpra bòna,
fata sna a prò dla Madòna.
Tènimòdi la Vérgin Maria,
du ch’jéra i fiur mai la savria,
e quand ch’is tròva t’un vašèt
jè pur sèimpre un bèl fiurèt.
Ivano Aurelio Muratori
MAGGIO CON LE ROSE E I ROSARI
Era scritto nel lunario,/ maggio con le rose e rosario./ A metà della primavera,/ si usciva già la sera.
Gli uomini, i primi a correr via,/ per far tappa nell’osteria,/ a giocare, a bere il vino,/ a mangiare due tre lupini.
I bambini dietro alle bambine,/ dietro alle lucciole e alle cicale,/ ritornavano poi nelle case,/ pieni di mandorle e ciliegie.
Uscivano i bei ragazzi,/ in amore nel mese di maggio,/ per fare dolci serenate alle ragazze innamorate.
Le donnine, a una cert’ora,/ uscivano dall’uscio,/ per avviarsi in compagnia,/ a pregare nel mese di Maria.
Nella chiesa per il rosario,/ col prete nel presbiterio,/ a dire: Padre, Ave e Gloria,/ con una lunga giaculatoria.
Di ritorno, pian pianino,/ guardavano ai giardini,/ stupite da tante rose,/ a dir poco meravigliose.
Lungo la strada, al chiar di luna,/ ogni tanto ne coglievano una,/ e tutte loro durante il viaggio,/ ne rimediavano un mazzo.
Credevano da sole,/ che raccogliere i fiori non fosse peccato,/ che fosse anzi un’opera buona,/ fatta solo a prò della Madonna.
Tanto la Vergine Maria,/ dov’erano i fiori mai lo saprebbe,/ e quando si trovano in un vasetto,/ son pur sempre un bel fioretto.
