E’ mi ba’ sudèd e mòll,/ us géva burdéll la ból!/ sla faza tót’ infughèda,/ sègn d’na bróta zurnèda.
E’ mi nòn mèz indurmèint,/ ui géva sla ból grazie tènt,/ butèma zó dó macarun,/ ch’am sò zà rät i quajun.
E’ ba’ ui géva me nòn,/ da stè zét e da stè bòn,/ pu e tiréva una biastima,/ isé la buliva prima.
Sa pjó d ‘na parulaza,/ us déva i s-ciaf tla faza,/ la mi ma’ prèocupéda,/ lai géva an pòs miga véda.
Šmèt da fè stal bambuzèdi,/ ch’ò dà còš al pièdi,/ e bèda che s’us ragna,/ at garantès ch’un si magna.
Mo ló incazèd ad brót,/ u n’avéva per tótt,/ e ma léa sa pòc riguérd,/ ui géva ch’l’éra tèrd.
La séna l’éra bèla,/ da fém vnì la rišarèla,/ e per giósta réaziòun,/ am ciapéva e’ scapazòun.
Perché quand la ból la ból,/ e isé um tuchéva tòl,/ mo ò imparè tótavia,/ che s’la ból us scapa via!
Ivano Aurelio Muratori
Mio babbo sudato e bagnato,/ ci diceva bambini bolle!/ con la faccia tutta arrossata,/ segno di una brutta giornata.
Mio nonno, mezzo addormentato,/ diceva se bolle grazie tanto,/ buttiamo giù due maccheroni,/ che mi sono già rotto i coglioni.
Il babbo diceva al nonno,/ di star zitto e di star buono,/ e giù una gran bestemmia,/ così bolliva prima.
Con più di una parolaccia,/ si dava degli schiaffi in faccia,/ mia mamma preoccupata,/ gli diceva non posso mica vedere.
Smetti di fare queste bambocciate,/ che devo cuocere le piade,/ e guarda che se si litiga,/ ti garantisco che non si mangia.
Ma lui incazzato di brutto,/ ne aveva per tutti,/ e a lei con poco riguardo,/ le diceva che era tardi.
La scena era proprio bella,/ da far venire la risarella,/ e per giusta reazione,/ mi prendevo lo scapaccione.
Perché quando bolle bolle,/ e così mi toccava prenderlo,/ ma ho imparato tuttavia,/ che se bolle si scappa via!
