Quand ch’a séra un burdél,/ sè prìm fréd invèrnèl,/agl’jarvéva sè fridór,/ al pastéini Rèsòldòr.
Garnèli d’rigurizia,/ ch’agl’jéra una dilizia,/ da ‘na scatula sè buš,/ al surtiva pròunti a l’uš.
Al féva bòn ma la vòša,/ quand la jéra ragajóša,/ e’ bastéva tòn un péra,/ ch’las fašéva pjó cèra.
Per la góla sè brušór,/ un s’andéva de dutór,/ gl’jéra sà quèli ch’ilé,/ per guarì in du tré dé.
Agl’jéra bòni d sapór,/ e agl’javéva un bel vigór,/ al déva e’ fié mi murt,/ e ma quii ch’i l’éva curt.
Quii sè fiè puzlèint,/ che in zir ui n’éra tènt,/ i maschèréva e’ fetór,/ se prufóm dal Rèsòldòr.
Mè ch’a séra un luvaciòun,/ sa quèli am féva um pcòun,/ sla bäca sèimpre pina,/ a švuitéva la scatulina.
Am tinzèva i dèint ad nér,/ cume quii de carbunèr,/ e’ sla bäca šbafièda,/ spèss am déva ‘na lavèda.
Ivano Aurelio Muratori
Quando ero un bambino,/ col primo freddo invernale,/ arrivavano col raffreddore,/ le pastiglie Resoldor.
Perle di liquirizia,/ che erano una delizia,/ da una scatola col buco,/ sortivano pronte per l’uso.
Facevano bene per la voce,/ quando era roca,/ bastava prenderne un paio,/ che si faceva più chiara.
Per il bruciore di gola,/ non si andava dal dottore,/ erano abbastanza quelle lì,/ per guarire in due tre giorni.
Erano buone di sapore,/ e avevano un bel vigore,/ davano fiato ai morti,/ e a quelli che l’avevano corto.
Quelli col fiato puzzolente,/ che in giro ce n’erano tanti,/ mascheravano il fetore,/ col profumo delle Resoldor.
Io che ero un golosone,/ con quelle mi facevo un boccone,/ con la bocca sempre piena,/ vuotavo la scatolina.
Mi tingevo i denti di nero,/ come quelli di un carbonaio,/ e’ con la bocca sbaffiata,/ spesso mi davo una lavata.
