Dòp un calòun dla vésta,
ò ciamè e’ mi litricésta,
a jò dêt: jèćć im bruša,
e’ sarà colpa dla luša!
A jó só dal lampadèini,
ch’lim per un po’ znèini,
dà n’ucèda fà pu té,
in mòdi ch’a pòsa ‘vdè.
Mèt ‘na lusa un po’ pjó fórta,
che de cunsóm un m’ impòrta,
sl’aumèinta la bulèta,
am faz fè una culèta.
Qualchedun e’ pagarà,
ò e’ Stèt o la mi mà,
an stag tènt a bazilè,
sal lampadèini da cambiè.
U m’à guèrs alibìd,
e pu u s’è mès a rid,
u m’à dét: s’ a vidì mèl,
tulì un pèra d’ucèll!
U vi vò l’uculésta,
èltre chè e’ litricésta,
la lampadèina fòrta,
lan vi cambia la sörta.
Avì jèćć ch’ jè d’uvàta,
vó avì la catarata,
èltre chè la lampadèina,
fév dè ‘na radanadèina.
Mè a jò dét: ciò pruchèga,
se t vò che dòp at pèga,
mèt só al lampadèini,
e nu fam tènti manfrèini.
Sina va per la tu strèda,
ch’at pèg sna la ciamèda,
e a m’arang da par mè,
che tènimòdi a sò fè.
Dop ch’l’ à ‘vù stè cichèt,
l’ à fat prèst e’ purèt,
a dèm la giósta luša,
e a dmandèm sinènt scuša.
Ivano Aurelio Muratori
IL MIO ELETTRICISTA
Dopo un calo della vista,/ ho chiamato il mio elettricista,/ gli ho detto gli occhi mi bruciano,/ sarà colpa della luce!
C’ho su delle lampadine,/ che mi sembrano un po’ piccole,/ dai un’occhiata, fai pur tu,/ in modo che possa vedere.
Metti una luce un po’ più forte,/ che del consumo non m’importa,/ se aumenta la bolletta,/ mi faccio fare una colletta.
Qualcheduno pagherà,/ o lo stato o mia mamma,/ non sto tanto a preoccuparparmi,/ con le lampadine da cambiare.
Mi ha guardato allibito,/ e poi si è messo a ridere,/ mi ha detto: se vedete male,/ mettetevi un paio d’occhiali.
Vi ci vuole l’oculista,/ altro che l’elettricista,/ la lampadina forte,/ non vi cambia la sorte.
Avete gli occhi che sono di ovatta,/ voi avete la cataratta,/ altro che la lampadina,/ fatevi dare una sistematina.
Io gli ho detto: ciò sfrontato,/ se vuoi che dopo ti paghi,/ metti su le lampadine,/ e non farmi tante manfrine.
Se no va per la tua strada,/ che ti pago solo la chiamata,/ mi arrangio da solo che tanto so fare.
Dopo che ha avuto questo cicchetto,/ ha fatto presto il poveretto,/ a darmi la giusta luce,/ e a domandarmi fintanto scusa.
