A Nadèl parèć i la manda
e i fà una fèsta granda,
i fà béin a vria véda,
tènimòdi l’è scuntèda.
Una vòlta, per èss frènc,
us fašèva sa mòlt mènc,
l’éra asà quel ch’u jéra,
ch’e’ vnìva da la tèra.
Us rispirèva tl’èria,
l’udór dla mišèria,
adès ch’l’è scunfèta,
tót quant is n’aprufèta.
I fà béin per carità,
la è bróta la puvertà,
tènt i créd s’un pruclèma,
d’avè risòlt e’ prubléma.
E’ diš qualcun ch’ e’ dà só,
la mišèria lan gn’è pjó,
buntà sua, u n’à j ucéll,
per véda quij ch’i stà mèl.
Sèinza fè e’ zir de mänd,
l’è ‘sà guardès da tänd,
per véda un pòri barbòun,
stéš s’un fòj d cartòun.
Quij ch’jariva si gumun,
pròpie iqué après ad nun,
che sa tènta carità,
ai spinzém un po’ pjó in là.
E quij che sèinza un lavór,
i va a ramèng e pu i mòr,
e ch’jèlt ch’i l’à pèrs,
jè fra jutme cmè dispèrs.
Quij che invèce i lavóra,
sa tré quatre euri a l’óra,
per arcòi i pumidòr,
a còst d’avè un lavór.
Ma tótt quist Bòn Nadèl,
sèinza òstrichi e cavièl,
i va tla Caritas a magnè,
jè jùtme ch’j’è rèst indré.
Ivano Aurelio Muratori
BUON NATALE AGLI ULTIMI
A Natale parecchi la mandano,/ fanno una festa grande,
fanno bene, vorrei vedere,/ tanto è scontata.
Una volta, ad essere sinceri,/ si faceva con molto meno,
era abbastanza quello che c’era,/ che veniva dalla terra.
Si respirava nell’aria,/ l’odore della miseria,
adesso che è sconfitta,/ tutti quanti se ne approfittano.
Fanno bene, per carità,/ è brutta la povertà,
tanti credono con un proclama,/ di aver risolto il problema.
Dice qualcuno che dà su,/ la miseria non c’è più,
bontà sua, non ha gli occhiali,/ per vedere quelli che stanno male.
Senza fare il giro del mondo,/ basta guardarsi attorno,
per vedere un povero barbone,/ steso su di un foglio di cartone.
Quelli che arrivano coi gommoni,/ proprio qui vicino a noi
che con molta carità,/ li spingiamo un po’ più in là.
E quelli che senza un lavoro,/ vanno a ramengo e poi muoiono,
e gli altri che l’hanno perso,/ sono fra gli ultimi come dispersi.
Quelli che invece lavorano,/ con tré quattro euri all’ora,
per raccogliere i pomodori,/ a costo di avere un lavoro.
A tutti questi Buon Natale,/ senza ostriche e caviale,
vanno alla Caritas a mangiare,/ sono gli ultimi che sono rimasti indietro.
