Se mèr ò un bòn rapòrt,
maj un dispèt e maj un tòrt,
a sém béin afiadèd
cume dó inamurèd.
La matèina vèrs al sé,
a vag zó a purtèi e’ bòndé,
e un gn’ amènca davéra,
vèrs al sét, la bònasèra.
E’ sbròfa e’ pu e’ barbòtla,
san gni dag la bònanòta,
l’è un po’ pèrmalóš,
cum ch’jè tót i muruš.
Dòp ch’a jò pòrt i mi salut,
a fém l’amór cume i mut,
ló e’ dvèinta spumènt,
e e’ squéza béin cuntèint.
Mè ai surid sl’ucét,
ai dég ch’u n’à da šmèt
e ló s’un sòfie ad brèza,
um spèdès una carèza.
A la sint e lam pièš,
tènt ch’ai faz bäca da bèš,
a vég che ló e’ gradès,
al mi mòsi u li capès.
A stém ilé a badurlès,
a suspirè e a guardès,
pché ch’an si putém tuché,
l’è n’amór fat isé.
Grand e a la dispérèda,
ad dó ch’is pò sna véda,
ch’is turmèinta, i patès,
mo jè cuntèint listès.
Ivano Aurelio Muratori
INNAMORATO DEL MARE
Col mare ho un buon rapporto,/mai un dispetto e mai un torto,/siamo ben affiatati,/ come due innamorati.
La mattina verso le sei,/ vado giù a portargli il buon giorno,/ e non gli manca davvero,/ verso le sette la buona sera.
Sbruffa e poi borbotta,/ se non gli dò la buona notte,/ è un po’ permaloso,/ come sono tutti i morosi.
Dopo che gli ho portato i miei saluti,/ facciamo l’amore come i muti,/ lui diventa spumante,/ e spruzza ben contento.
Io gli sorrido con l’occhietto,/ gli dico che non deve smettere,/ e lui con un soffio di brezza,/ mi spedisce una carezza.
La sento e mi piace,/ tanto che le faccio bocca da baci,/ vedo che lui gradisce,/ le mie mosse le capisce.
Stiamo lì a spassarcela,/ a sospirare e a guardarci,/ peccato che non possiamo toccarci,/ è un amore fatto così.
Grande e alla disperata,/ di due che si possono solo vedere,/ che si tormentano, che patiscono,/ ma son contenti lo stesso.
