Nun per aqua minèrèla,
émie quèla dla canèla,
tna bòcia sna pulvrina,
la famóša idròlitina.
Dièš doši inscatulèdi,
sa cartèini separèdi,
l’èra chèmica pura,
per fè fròunt ma l’arsùra.
U la féva tót i dé,
e’ mi ba’ enzi d’magnè,
che fè l’aqua gašéda,
l’è ròba cumplichèda.
E’ cminzéva un po’ prima,
e’ mitéva la pulvrina,
t ‘na bòcia d’aqua giaza,
che šbatéva cmè ‘na sdaza.
In tót l’upèraziòun,
ui vlèva cura e’ aténziòun,
e un bèl po’ d’ardimèint,
cumè t n’éspérimèint.
La su bòcia las ciudéva,
s’un mècansime a léva,
s’ un tap sla guarniziòun,
che tniva la prèsiòun.
E quand ch’l’éra tròpa,
la bòcia la è s-ciòpa,
per vi’ dl’idròlitina,
ui scapèva una biastima.
Dòp e mi ba’ u l’arféva,
e pu quand ch’u la varzèva,
e’ surtiva un fat s-ciumòun
da sembrè e’ selz de sifòun.
Mo gnint d’écéziunèl,
sna bicarbonato e sèl,
ma nujèlt, pòri balòša,
las parèva chisà còša.
E a gémie: che ròba bèla,
èlt che quela dla canèla,
quèsta sé che las bév béin,
us fà mènc ènca de vèin.
Ivano Aurelio Muratori
L’ ACQUA CON L’IDROLITINA
Noi per acqua minerale,/avevamo quella del rubinetto,/ in una bottiglia con una polverina,/ la famosa idrolitina.
Dieci dosi inscatolate,/ con cartine separate,/ era chimica pura,/ per far fronte all’arsura.
La faceva tutti i giorni,/ mio babbo prima di mangiare,/ che fare l’aqua gassata,/ era una cosa complicata.
Cominciava un po’ prima,/ metteva la polverina,/ in una bottiglia di acqua fredda,/ che scuoteva come un setaccio.
In tutta l’operazione,/ ci voleva cura e attenzione,/ e un bel po’ di ardimento,/ come in un esperimento.
La sua bottiglia si chiudeva,/ con un meccanismo a leva,/ e un tappo con la guarnizione,/ che teneva la pressione.
E quando era troppa,/ la bottiglia è scoppiata,/ per via della idrolitina,/ ci scappava una bestemmia.
Dopo mio babbo la rifaceva,/ e poi quando la apriva,/ usciva un fatto schiumone,/ da sembrava il selz del sifone.
Ma niente di eccezionale,/ solo bicarbonato e sale,/ a noi poveri allocchi,/ ci sembrava chissà cosa.
E dicevamo: che roba bella,/ altro che quella della cannella,/ questa si che si beve bene,/ si fa a meno anche del vino.
