L’è dmènga, an lavór,
e am vèj vistì da sgnór,
ènca mè am vèj š-gagè,
ch’am sò stóf da védme isé.
Sia d’instèda che d’invérni,
a pèr l’òm dal cavérni,
a faz al buši te camsènt,
an pòs ès mòlt élèghènt.
Ò madòs ‘na tuta néra,
s’un britìn sla višjèra,
ò sinènt e’ davantèl,
an pèins da ès tènt bèl.
Sla muda da bècamòrt,
ch’l’è vint an ch’a pòrt,
a stag cumè un baldaz,
che fà spavantè i raz.
Mè ch’a jò un vstid bló,
a stè punt a me mèt só,
un bèl däpiepèt gèsèd,
ch’u n’è mai stè lavèd.
L’è guaši cume nòv,
a me mèt, èmènc al dròv,
se e’ stà ilé tl’armèrie,
i se magna tót i tèrle.
La gravata culór pana,
firmèda Dolce e Gabana,
la camiša ad séda pura,
per fè ‘na bèla figura.
Quand la mi möj la m’à vést,
la à dét: Oh Gišù Crést!
Mo tan te ne s’incòrt,
che t ci vistìd da mòrt?
T’am per un ad zènt an,
fà prèst a cavèt ch’ i pan,
l’è la mòda ad vint an fà,
vat a spujè per carità!
Os-cia che sudisfaziòun,
a vléva fè un figuròun,
a sò rèst com un pataca,
mo si calzun e la giaca.
Ivano Aurelio Muratori
MI METTO IN DOPPIOPETTO
È domenica, non lavoro,/ e mi voglio vestire da signore,/ anche io mi voglio attillare,/ che sono stanco di vedermi così.
Sia d’estate che d’inverno,/sembro l’uomo delle caverne,/ scavo le fosse nel cimitero,/ non posso essere molto elegante.
Ho addosso una tuta nera,/ con un berrettino con la visiera,/ ho persino il davantale,/ non credo di essere tanto bello.
Con la divisa da beccamorto,/ che è vent’anni che porto,/ sto come uno spaventapasseri,/ che fa spaventare gli uccelli.
Io che ho un vestito blu,/ a questo punto me lo metto su,/ un bel doppiopetto gessato,/ che non è mai stato lavato.
È quasi come nuovo,/ me lo metto almeno lo adopero,/ se sta lì nell’armadio se lo mangiano tutto i tarli.
La cravatta color panna,/ firmata Dolce e Gabbana,/ la camicia di seta pura,/per fare una bella figura.
Quando mia moglie mi ha visto,/ ha detto: oh Gesù Cristo!/ Ma non te ne sei accorto,/ che ti sei vestito da morto?
Mi sembri uno di cent’anni,/ fai presto a cavarti quei panni,/ è la moda di vent’anni fa,/ vatti a spogliare per carità!
Osta che soddisfazione,/ volevo fare un figurone,/ sono rimasto come un pataca,/ ma con i pantaloni e la giacca.
