In pscaria ò vést un,
dré al casèti ad sardùn,
alóra mè a jò dét:
quii ch’ilé is fà frét?
U m’à magnè la faza,
u m’à dét una rubaza,
e pu um fà: t ci rimnéš,
o d’u n’ènt paèš?
Perché frét quist ii magna,
quii ch’i stà in campagna,
lór i frèz ènca la sòla,
l’è tót òglie ch’e’ còla.
An pòs dì ch’i faza schiv,
e gnènca ch’i sia cativ,
mo da tént òglie imbumbid,
per mè jè de tót pruibid.
Frét, ènca s’l’è pès,
miga sèimpre us digèrès,
e’ stömèg ui manda indrè,
e’ i s’à da gumitè.
Mèj i sardun còt aròst,
i dà una masa pjó góst,
jè sót, béin brustighèd,
isé i vò ès magnèd.
Sal mèni a scòta dèda,
te mèz d’una pièda,
sla zväla e si radèćć,
cumè ch’i féva i nòst vèćć.
A jò dét, per dèi rašóun,
ui féva aròst ènca e’ mi nòn,
ènca e’ mi ba’ e ènca mè,
mo a ne sò cmè tai fè té!
U m’à dét: ciò l’è mezdè,
e a jò tót e’ pès iqué,
t’è capì ch’u s’è fat tèrd,
e me a n’ò tèimp da pèrd.
Ivano Aurelio Muratori
I SARDONI SI FANNO FRITTI?
In pescheria ho visto uno,/ dietro alle cassette di sardoni,/ allora io gli ho detto:/ quelli lì si fanno fritti?
Mi ha mangiato la faccia,/ mi ha detto una robaccia,/ e poi mi fa: sei riminese,/ o sei di un altro paese?
Perché fritti questi li mangiano,/ quelli che stanno in campagna,/ loro friggono anche la suola,/ è tutto olio che cola.
Non posso dire che facciano schifo,/ e neanche che siano cattivi,/ ma da tanto olio imbevuti,/ per me sono del tutto proibiti.
Fritti, anche se è pesce,/ mica sempre si digerisce,/ lo stomaco li manda indietro,/ e si devono vomitare.
Meglio i sardoni cotti arrosto,/ danno molto più gusto,/ sono asciutti, ben arrostiti,/ così vogliono essere mangiati.
Con le mani a scottadito,/ nel mezzo di una piada,/ con la cipolla e i radicchi,/ come facevano i nostri vecchi.
Gli ho detto per dargli ragione,/ li faceva arrosto anche mio nonno,/ anche mio babbo, anche io,/ volevo vedere come li facevi tu!
Mi ha detto: dì è mezzogiorno,/ e ho tutto il pesce qui,/ hai capito che si è fatto tardi,/ e io non ho tempo da perdere.
