Quand us fà nòta avria vòja,
d’na mèna che lam spòja,
ch’lam mèta drèinta e’ lèt,
ch’lam tènga béin da strèt.
Intènt ch’a fém l’amòr,
lam sinta a bat e’ còr,
e pu strac e sbandunéd,
arpunsès tót dó abrazèd.
Sa cla mèna ch’lam tèca,
j’èćć, e’ nèš e la bäca,
un dèda strèt tra i dèint,
l’è isé ch’a m’indurmèint.
Èssa lam ciapa in pógn,
e l’am fà fè di bei insógn,
da e’ lèt lam pòrta via,
spinta da la fantašia.
Te zél, se mèr, du cla vò,
in èlt in èlt e pu zó,
sor’i prè ad qua ad là,
in zèrca dla libèrtà.
A vòl sl’aquilòun,
ch’um fašèt e’ mi pòr nòn,
béin alghèd ma cla mèna,
da un fil ch’u l’inacadèna.
Quand ch’a cal zó in picèda,
cmè l’aqua dna caschèda,
u j’è cla mèna vèrta,
ch’lam tèin da la su pèrta.
Da l’insógn l’am švègia,
l’am vèrz jèćć, lam scavècia,
e da mè la vò savè,
tót quèl ch’am sò insugnè.
Sèinza mèna ch’lam tèin,
avria un brót dèstèin,
an faria di bel insógn,
sa nisun ch’um tèin te pógn.
Ivano Aurelio Muratori
UNA MANO CHE MI TIENE
Quando si fa notte avrei voglia,/ di una mano che mi spogli,/ che mi metta dentro al letto,/ e che mi tenga ben stretto.
Intanto che facciamo l’amore,/ mi senta a battere il cuore,/ e poi stanchi e abbandonati,/ riposarci tuttedue abbracciati.
Con quella mano che mi tocca,/ gli occhi, il naso e la bocca,/ un dito stretto fra i denti,/ è così che mi addormento.
Essa mi prende in pugno,/ e mi fa fare dei bei sogni,/ dal letto mi porta via,/ spinta dalla fantasia.
Nel cielo, sul mare, dove vuole,/ in alto in alto e poi giù,/ sui prati di qua e di là,/ in cerca della libertà.
Volo sull’aquilone,/ che mi fece mio povero nonno,/ ben legato a quella mano,/ da un filo che la incatena.
Quando calo giù in picchiata,/ come l’acqua di una cascata,/ c’è quella mano aperta,/ che mi tiene dalla sua parte.
Dal sogno mi sveglia,/ mi apre gli occhi,/ mi scapiglia,/ e da me vuol sapere tutto quello che ho sognato.
Senza mano che mi tiene,/ avrei un brutto destino,/ non farei dei bei sogni,/ con nessuno che mi tiene in pugno.
