La dmènga tra léa e mè,
purtròp u jè da ragnè,
quèst per via d la mèsa,
che insèin lan s’è permèsa.
Perché ma un ch’a saria mè,
ui téca fè da magnè,
mèintre lèa, la pachèsa,
l’am diš a vag a la mèsa.
Quand la tòrna semèzdé,
e’ magnè l’è ilé,
mai ch’la s’ lamèinta,
e’ vò dì ch’l’è cuntèinta.
Però ‘na dmènga fa,
la vèin da mè la mi ma’,
a védme a fè la spòja
la m’à dét: pòrca bòja,
té purèin spatac ilé,
sla tu möj ch’la tó e’ cafè,
sè prét té barèt dla ciša,
sèinza ch’la t’aviša.
Mè a jò dét an sò zlós,
e’ prét l’è rèligióš,
fém al còrni e’ saria tròp,
mo se dà ai tir sè s-ciòp.
Dop dla mèsa vèrs mèzdé,
la è tòrna per magnè,
mè a jò dét: òz lan bóta,
t’arvènz a bäca sóta.
Da magnè ta te fè té,
tci andè a tò e’ cafè,
sa che birb de sacerdòt,
adès dìm da mè ‘sa vòt?
Ivano Aurelio Muratori
UN CAFFÈ COL PRETE!
La domenica tra lei e me,/ purtroppo c’è da litigare,/ questo per via della messa,/ che assieme non c’è permessa.
Perché a uno che sarei io,/ tocca far da mangiare,/ mentre lei superba,/ mi dice vado alla messa.
Quando torna a mezzogiorno,/ il mangiare è lì,/ mai che si lamenti,/ vuol dire che è contenta.
Però una domenica fa,/ viene da me mia mamma,/ a vedermi a far la sfoglia,/ mi ha detto: porca boja,
tu poverino lavori qui,/ con tua moglie che prende il caffè,/ col prete nel baretto della chiesa,/ senza che ti avvisi.
Io le ho detto non son geloso,/ il prete è religioso,/ farmi le corna sarebbe troppo,/ ma se fosse gli sparo col fucile.
Dopo la messa verso mezzogiorno,/ è tornata per mangiare,/ io le ho detto: oggi non butta,/ rimani a bocca asciutta.
Da mangiare te lo fai tu,/ sei andata a prendere il caffè,/ con quel furbo del sacerdote,/ adesso dimmi da me cosa vuoi?
