A stag só se fè de dé
quand e’ gal l’à cantè,
dato che tót al matèini,
ò da tò un scról d pastèini.
‘Na ròba ch’ò da fè,
sa vój incóra campè,
‘na briga ch’ las supòrta,
un caz mej ca ne la mòrta.
Per nu ciapè un s-ciupòun,
am cuntròl còr e prèsiòun,
s’a véd ch’l’è èlta,
ad pastèini an tòg un’ènta.
Dòp cal gl’j upèraziòun,
am pripèr la mi claziòun,
un cafè s’un maritòz,
che tènimòdi an m’ingòz.
Pu am lèv, am vist, am faz bèl,
e a vag a lèz e’ giurnèl,
te bar ilazó se pòrt,
du ch’a tròv pèša e cunfòrt.
Spèss a faz ‘na ciacarèda,
sa qualchèdun sla palèda,
e tramèza mi cuchèl,
a fém i cunt di nòst mèl.
Fra ciacra e ciacra ui stà béin,
mastighè qualche luvéin
e l’è pu quèl ch’a fém,
mèintre che a spasigém.
Mè am fèrme mi barchét,
per tò un chèl ad mulét,
e ai pòrt a chèša ad vulèda,
ch’u m’è pas la matinèda.
Ivano Aurelio Muratori
MI È PASSATA LA MATTINATA
Sto su sul far del giorno,/ quando il gallo ha cantato,/dato che tutte le mattine,/ devo prendere un sacco di pastine.
Una cosa che devo fare,/ se voglio ancora campare,/ una briga che si sopporta,/ un cazzo meglio della morte.
Per non prendere un accidente,/ mi controllo cuore e pressione,/ se vedo che è alta,/ di pastine ne prendo un’altra.
Dopo quelle operazioni,/ mi preparo la mia colazione,/ un caffè con un maritozzo,/ che tanto non m’ingozzo.
Poi mi lavo, mi vesto, mi faccio bello,/ e vado a leggere il giornale,/ nel bar lag giù sul porto,/ dove trovo pace e conforto.
Spesso faccio una chiacchierata,/ con qualcuno sulla palata,/ e in mezzo ai gabbiani,/ facciamo il conto dei nostri mali.
Fra chiacchiera e chiacchiera ci sta bene,/ masticare qualche lupino,/ ed è poi quel che facciamo,/ mentre passeggiamo.
Io mi fermo ai barchetti,/ per prendere un chilo di moletti,/ li porto a casa di volata,/ che mi è passata la mattinata.
