A còš l’uliva us fà prèst,
basta mètla sóra e’ tèst,
sa dó tré pézg ad sèl sóra,
las còš t’un quèrt d’óra.
Còta se fèr a la grèza,
ui rèsta l’amarèza,
un sapór particulèr,
per chi e’ gradès l’amèr.
Mo l’uliva bšägna féla,
sla sunzéza tla padèla,
indóv che e’ dólz de baghìn,
us spòša sl’amartin.
E’ vèin fóra da spòš,
un amarògnul untuòš,
che sèinz’èltre e’ va bèin,
ènc per i palèd pjó fèin.
La sunzéza bòna e bèla,
la s’aròšla intl a padèla,
sè šmarèin e l’aj se pièš,
e las sfóma sè sanzvèš.
L’uliva la va curèda,
prima us schèrta cla ticèda,
epù bšägna lavèla,
e mètla zó tla padèla.
Las sèla cun e’ sèl fèin,
du ch’u jè aj e’ šmarèin
la sunzéza ch’j curèz,
‘na muliga l’amarèz.
La è còta quant ch’us véd,
ch’las vérz, se fog la zéd,
tènimòdi las sèint,
quand ch’la jè säta dèint.
Un gn’è un che in Rumagna,
la sunzéza un la magna,
quand las spóša sl’uliva
la dvèinta superlativa.
Ivano Aurelio Muratori
SALSICCIA E OLIVA, ROBA SUPERLATIVA!
A cuocere l’oliva si fa presto,/ basta metterla sul testo,/ con due tre pizzichi di sale sopra,/ si cuoce in un quarto d’ora.
Cotta sul ferro alla grezza,/ ci resta l’amarezza,/ un sapore particolare,/ per chi gradisce l’amaro.
Ma l’oliva bisogna farla,/ con la salsiccia nella padella,/ dove il dolce del maiale,/ si sposa con l’amarino.
Viene fuori da sposati,/ un amarognolo untuoso,/ che senz’altro va bene,/ anche per i palati più fini.
La salsiccia buona e bella,/ si rosola nella padella,/ col rosmarino e l’aglio se piace,/ e si sfuma col sangiovese.
L’ oliva va curata,/ prima si scarta quella segnata,/ e poi bisogna lavarla,/ e metterla giù nella padella.
Si sala col sale fino,/ dove ci sono aglio e rosmarino,/ la salsiccia che corregono un po’ l’amaro.
È cotta quando si vede,/ che si apre, al fuoco cede,/ tanto si sente,/ quando è sotto i denti.
Non c’è uno che in Romagna,/ la salsiccia non la mangi,/ quando si sposa con l’oliva,/è una cosa superlativa.
