Per quij ch’jà e’ green pass,
e’ Nadèl l’è un spas,
ènca se per precauziòun,
jà da fè qualche tampòun.
Te palaz du ch’a stag mè,
il fà un dé na e un dé sé,
isé quand che mè ariv,
tót im diš a sém negativ.
S’us vò andè a un cino,
ui vò tré doši ad vacino,
chi vò andè a e tèatre,
l’è mej ch’un faza quatre.
Ò savù che a Ušdalètt,
j vacina ènca i caplét,
e jà fat e’ tampòun,
me plit e me capòun.
Adess säta e’ Nadèl,
i vacina ènca i burdèll,
e ma lór u jè stè dét,
gnint vacino gnint caplét.
Avènti isé dop d Nadèl,
ui sarà l’òblig vacinèl,
sina per la befèna,
a finém in quarantèna.
Mè an dég gnint per carità,
quand i’m cèma a vag ilà,
e perchê i’m vacina,
andria adiritura in Cina.
Se qualcun us tira indré,
te su pòst ai vag mè,
e cum ch’us dis da nun,
dó jè mej che un.
E arcurdèv che per Nadèl,
e’ vacino bšägna fél,
bšägna fél ènca dòp,
che tènimòdi u n’è mai tròp.
Ivano Aurelio Muratori
COL GREEN PASS IL NATALE È UNO SPASSO
Per quelli che hanno il green pass,/ il Natale è uno spasso,/ anche se per precauzione,/ devono fare qualche tampone.
Nel palazzo dove sto io,/ lo fanno un giorno no e un giorno sì,/ così quando io arrivo,/ tutti mi dicono siamo negativi.
Se si vuole andare al cinema,/ ci vogliono tre dosi di vaccino,/ chi vuole andare a teatro,/ è meglio che ne faccia quattro.
Ho saputo che a Ospedaletto,/ hanno vaccinato i cappelletti,/ e hanno fatto il tampone,/ al tacchino e al cappone.
Adesso sotto il Natale,/ vaccinano anche i bambini,/ e a loro gli è stato detto,/ niente vaccino, niente cappelletti.
Avanti così dopo Natale,/ ci sarà l’obbligo vaccinale,/ se no per la Befana,/ finiamo in quarantena.
Io non dico niente per carità,/ quando mi chiamano vado là,/ e perché mi vaccinino,/ andrei addiritura in Cina.
Se qualcuno si tira indietro,/ al suo posto vado io,/ e come si dice da noi,/ due sono meglio di uno.
Ricordatevi che per Natale,/ il vaccino bisogna farlo,/ bisogna farlo anche dopo,/ che tanto non è mai troppo.
