Órmaj ò fnì d campè,
s’arnas a faz e’ frè,
e’ diretór a ne faz pjó,
a vòj ès tót per Gišó.
L’è un lavór ligér,
u n’è pròpi un mis-cèr,
e’ frè lavuradór,
e’ dipènd da e’ Signór.
E pu quèl ch’u jè d bèl,
l’è che i frè jè tótt fradel,
i diš agl’juraziòun,
e i s’aiuta quand jà bšägn.
Mè a vag ti Franzes-chèn,
ch’jé frè ch’i fà de béin,
sla règla óra et labòra,
an pèins ch’im lasa fóra.
Sna che i frè in pò tò möj,
l’è pròpie quèl ch’a vòj,
apòsta a vag te cunvèint,
da pu ch’a sò stè s-cmént.
A cminzarò da znin,
andè a scòla da ciarghin,
e quand ch’ò imparè,
am mitrò e’ séj di frè.
Te cunvèint us stà béin,
un gn’è bšägn di quatrèin,
per ògni situaziòun,
u jè ilé frè zarcantòun.
Bšägna dì sincéramèint,
ch’l’è mej de risturènt,
ilé us magna a la granda,
cumè che Dio e’ cmanda.
Qualche vòlta per furtuna,
e per regula, us digiuna,
che i frè i magna ‘na masa,
e u n’è bèl ch’ i s’ingrasa.
Jà tót i gènèr ad cunfòrt,
i fà i liquór, jà l’òrt,
la cantèina, e’ pulèr,
fè e’ frè l’è un bel afèr.
Ivano Aurelio Muratori
SE RINASCO FACCIO IL FRATE
Ormai ho finito di campare,/ se rinasco faccio il frate,/ il direttore non lo faccio più,/ voglio essere tutto per Gesù.
È un lavoro leggero,/ non è proprio un mestiere,/ il frate lavoratore,/ dipende dal Signore.
E poi quello che c’è di bello,/ è che i frati son tutti fratelli,/ dicono le orazioni,/ e si aiutano quando hanno bisogno.
Io vado nei Francescani,/ che son frati che fan del bene,/ con la regola “ora et labora”,/ non penso che mi lascino fuori.
Solo che i frati non possono prendere moglie,/ è proprio quello che voglio,/ apposta vado nel convento,/ dal momento che sono stato scottato.
Comincerò da piccolo,/ andare a scuola da chierico,/ e quando ho imparato,/ mi metterò il sajo dei frati.
Nel convento si sta bene,/ non c’è bisogno di quattrini,/ per ogni situazione,/ c’è il frate cercantone.
Bisogna dire sinceramente,/ che è meglio del ristorante,/ lì si mangia alla grande,/ come Dio comanda.
Qualche volta per fortuna,/ e per regola si digiuna,/ che i frati mangiano molto,/ e non è bello che ingrassino.
Hanno tutti i generi di conforto,/ fanno i liquori,/ hanno l’orto,/ la cantina, il pollaio,/ fare il frate è un affare.
