A la fèin as n’andém,
u n’impòrta pjó chi sém,
e gnènca chi sém stè,
tènimòdi us täca andè.
A vulèm via cume jušèl,
forse sèinza aprudè invèl,
sèinza un èrbur o un sit,
per farmès a fè e’ nid.
E pò ès ch’andèma pèrs,
te gran švóit dl’univèrs,
e strasinès d’ingatun,
in zèrca ad qualchèdun.
An savria chi ch’ui pò ès,
e sa ló cmè regulès,
sèinza nóm, sèinza stòria,
sèinza còrp e mèmoria.
Per dmandèi ad préciš,
se quèl l’è e’ paradiš,
e magari fè la squèrta,
ch’l’è d’u n’ènta pèrta.
Quanta zèinta ch’ui sarà,
ch’lal zérca ad quà e dlà,
di migliun o di miglièrd,
l’è forse mej lasè pèrd.
Tót ch’in zcär, in véd, in sìnt,
zà ch’i n’è pjó gnint,
l’è fadiga a imazinè,
mès isé du ch’i pò andé.
Tl’univèrs com i muslèin,
quand i vòla se mòst de vèin,
ch’i fà cla gran nuvlaja,
cla s’amócia e las sparpaja.
Ivano Aurelio Muratori
PERSI NELL’UNIVERSO
Alla fine ce ne andiamo,/ non importa più chi siamo,/ e neanche chi siamo stati,/ tanto ci tocca andare.
Voliamo via come gli uccelli,/ forse senza un approdo,/ senza un albero o un posto,/ dove fermarsi e fare il nido.
Può essere che andiamo persi,/ nel gran vuoto dell’universo,/ e trascinarci carponi, in cerca di qualcuno
Non saprei chi ci può essere,/ e con lui come regolarsi,/ senza nome, senza storia,/ senza corpo né memoria.
Per chiedergli di preciso,/ se quello è il paradiso,/ e magari far la scoperta,/ che è da un’altra parte.
Quanta gente ci sarà,/ che lo cerca di qua e di là,/ dei milioni o dei miliardi,/ è quasi meglio lasciar perdere.
Tutti che non parlano, non vedono, non sentono,/ giacché non son più niente,/ è fatica immaginare,/ messi così dove possono andare.
Nell’universo, come i moscerini,/ quando volano sul mosto del vino,/ che fanno quella gran nuvolaglia,/ che si ammucchia e si sparpaglia.
