Mè al magn e’ panitòun,
zà ch’ i diš ch’l’è bòn,
mo in mi piès una masa,
i candid e l’óva pasa.
L’è un dòlz ch’e fà Nadèl,
l’è bèin quèst e’ su bél,
mo e’ fà ènca milanèš,
quand che mè a sò rimnèš.
Gnint da dì per carità,
sa Milèn cla gran zità,
bèinché e’ panitòun,
mu mè um fàza e’ patòun.
Mè a magn ènca e’ Pandòr,
simbèin sa pòc sapór,
l’è e’ dòlz ad Verona,
l’è sicur ròba bòna.
Pin ad zóchèr vaniglièd,
da i lóv l’è aprèzèd,
mo sla glicemìa un po’ èlta,
us pò s-ciòpè a la svèlta.
A Rémin e’ dòlz dla chèša,
l’è la sópa inglèša,
sicóm la è d’iqué,
us magna quela ch’ilé.
Un gn’è bšägn da dì gnint,
la sópa inglèša las sint,
sla ciculata e crèma pasticèra,
me panitòun lai fà ‘na péra!
Insupèda d’ liquór,
la è mej de sót pandòr,
ch’ut si fèrma se gòz,
sè re-sce che ta t’astròz.
Av la cunsèglie per Nadèl,
sa quèla av fè un bel righèl,
e’ pjó bòn dòlz de nòst paéš,
e nu cridì che sia inglèš!
Muratori Ivano Aurelio
PANETTONE, PANDORO O ZUPPA INGLESE?
Io lo mangio il panettone,/ già che dicono che è buono,/ ma non mi piacciono molto,/ i canditi e l’uvetta.
È un dolce che fa Natale,/ è ben questo il suo bello,/ ma fa anche milanese,/ quando io son riminese.
Niente da dire per carità,/ su Milano quella gran città,/ benché il panettone,/ a me faccia il pattone.
Io mangio anche il pandoro,/ sebbene con poco sapore,/ è il dolce di Verona,/ è sicuro roba buona.
Pieno di zucchero vanigliato,/ dai golosi è apprezzato,/
ma con la glicemia un po’ alta,/ si può crepare alla svelta.
A Rimini il dolce della casa,/ è la zuppa inglese,/ siccome è di qui,/ si mangia quella lì.
Non c’é bisogno di dir niente,/ la zuppa inglese si sente,/
con la cioccolata e crema pasticciera,/ al panettone gli fa una pera!
Inzuppata di liquore,/ è meglio dell’asciutto pandoro,/ che ti si ferma sul gozzo,/ col rischio che ti strozzi.
Ve la consiglio per Natale,/ con quella vi fate un bel regalo,/ il più buon dolce del nostro paese,/ e non crediate che sia inglese.
