Té bar im dà ‘na s-ciafa,
am zir l’éra la gnafa,
ch’lam gét: té t ci iqué?
Ch’at vag zèrcand da tré dé!
Mè carèin a sò la mòrta,
e per tu cativa sòrta,
l’è ‘rvata la tu òra,
at dag zinc minut incóra.
Adèss ch’a t’ò scuvè,
fà prèst a bé e’ cafè,
tò ‘na grapa, fà e’ brèv,
che l’è l’utma che ta la bév.
Se tci la mòrta u m’arincrès,
mè a sò sèn cumè un pès,
pòst ch’an sò incóra mòrt,
adèss va via ch’an ti supòrt.
Perché tci maschèrèda?
Ta t’agrèst da fét vèda?
fà e’ piašèr tòd de caz,
bròta vèćia vstida ad straz.
Che mè a n’ò intènziòun,
da pasè per quajòun,
che la mòrta in chèrna e òsa,
lam per una ròba gròsa.
Léa lam gèt: ciò béda bèin,
da fè in prèsia ch’ut cunvèin,
st’a t’impunt e tan vèin via,
a faz avnì la polizia.
Vést ch’la butèva mèl,
ai dég mè an vèng invèl,
pu sna mòsa birichina,
a jò cavè la maschèrina.
Ò squèrt e’ mi amig Luiš,
ch’u m’à fat un bèl suriš,
a jò dét un m’impòrta,
mo nu schèrzéma sla mòrta.
Ivano Aurelio Muratori
NON SCHERZIAMO CON LA MORTE!
Nel bar mi danno uno schiaffo,/ mi giro era la morte,/ che mi disse tu sei qui?/ che ti vado cercando da tre giorni!
Io carino sono la morte,/ e per tua cattiva sorte,/ è arrivata la tua ora,/ ti dò cinque minuti ancora.
Adesso che ti ho scovato,/ fa presto a bere il caffè,/ prendi una grappa, fa il bravo,/ che è l’ultima che ti bevi.
Se sei la morte mi dispiace,/ io son sano come un pesce,/ posto che non sono ancora morto,/ adesso va via che non ti sopporto.
Perché sei mascherata?/ Ti dispiace di farti vedere?/ Fammi il favore, togliti dal cazzo,/ brutta vecchia vestita di stracci
Che io non ho intenzione,/ di passare per coglione,/ che la morte in carne e ossa,/ mi sembra una roba grossa.
Lei mi disse:/ ciò bada bene,/ di fare in fretta che ti conviene,/ se t’impunti e non vieni via,/ faccio venire la polizia.
Visto che buttava male,/ le dico io non vengo da nessuna parte,/ poi con una mossa birichina,/ le ho tolto la mascherina.
Ho scoperto il mio amico Luigi,/ che mi ha fatto un bel sorriso,/ gli ho detto non m’importa,/ ma non scherziamo con la morte.
