Quand l’è al sét am èlz,
a pèt nud e a pid schèlz
a vag fóra sla tèraza,
per ciapè èria tla faza.
E’ vèn só da te zardèin,
l’udór d sèlvia e d šmarèin,
quèl de bašèlg e dla mèinta,
isé dolz che l’inchènta.
A sint ènca quii de mlór,
de sèlèr e pumidòr,
ch’jariva zèntilmèint,
s’una fulèda ad vèint.
Jèćć is pónsa si culùr,
ch’i spéca me di fiùr,
i sèmbra fat da un pitór,
un artèsta de culór.
Sóra in èlt us vèrz un zél,
sun culór ènca pjó bèl,
un zilistèin ch’ us šbiènca,
ló l’è srèin e’ mè ènca.
E vèin fóra ilé davènti,
tramèza un mòćć ad piènti,
e’ sól dla prima matèina,
cl’arlùš cmè purpurèina.
I raztin béin cuntèint,
i fà sintì gurghègg e chént,
ch’i mét madòs bon umór,
mu mè e ènca ma lór.
Mèintre a guèrd tótt in zir,
a sint l’èria ch’a rèspir,
pulida e prufumèda,
per dì: che bèla zurnèda!
Ivano Aurelio Muratori
MA CHE BELLA GIORNATA!
Quando sono le sette mi alzo,/ a petto nudo e a piedi scalzi,/ vado fuori sulla terrazza,/ per prendere aria in faccia.
Viene su dal giardino,/ l’odore di salvia e rosmarino,/ quello del basilico e della menta,/ così dolce che incanta.
Sento anche quello dell’alloro,/ del sedano, del pomodoro,/ che arrivano gentilmente,/ con una folata di vento.
Gli occhi si posano sui colori,/ che spiccano dai fiori,/ sembrano fatti da un pittore,/ un artista del colore.
Su in alto si apre un cielo,/ con un colore anche più bello,/ un celestino che si sbianca,/ lui è sereno e io anche.
Viene fuori lì davanti,/ in mezzo a un mucchio di piante,/ il sole della prima mattina,/ che riluce come porporina.
Gli uccellini ben contenti,/ fanno sentire gorgheggi e canti,/ che mettono addosso buon umore,/ a me e anche a loro.
Mentre guardo in giro,/ sento l’aria che respiro,/ pulita e profumata,/ per dire: che bella giornata!
