A durmiva e am sò incòrt,
da truvém drèinta un òrt,
sa San Piètre ch’um géva,
e’ nóm ad quel ch’e’crìséva.
Dal mlanzèni isé gròsi,
da dè l’idéa dal còsi,
al zuchini ad dimensiòun,
ad quèla che l’à l’òm.
Per nu dì di zudarnèl,
di ròb fóra de nurmèl,
e mè ò cridù pòc dòp,
d’ès t un sexi shop.
Quand ò vést dal bèli péri,
a ne sò se finti o véri,
agl’jò téchi apèna apèna,
ch’l’a sunè la sirèna.
Us fà viv e’ Padrètèrne,
ch’um diš: t vò stè fèrme!
E’ tuca tuca ta ne fè,
iqué du ch’ai sò mè.
A sò arvènz intèrdèt,
isé che mè a jò dét,
a sò iqué sna per véda,
San Pietre e’ pò fè fèda.
Av faz di gran cumplimèint,
per quèl ch’avì piènt,
‘na dmanda um täca fèla,
cume maj sta ròba béla?
A dròv dla mèrda s-cèta,
ai la bòt cun la caplèta,
quèsta l’è ròba bio,
giósta per l’òrt ad Dio.
Al mi piènti am guèrd bèin,
da tirèli só si vlèin,
an faz cumè i fà in tèra,
ch’i cuncima sla purchèra.
Adèss carèin artòrna zó,
e dii cumè iquasó,
a sém bon ad cuncimè,
che jà tót da imparè.
Ivano Aurelio Muratori
L’ORTO DEL SIGNORE
Dormivo e mi sono accorto,/ di trovarmi dentro un orto,/ con San Pietro che mi diceva,/ il nome di quello che cresceva.
Delle melanzane così grosse,/ da dare l’idea delle coscie,/ le zucchine di dimensione,/ di quella che ha l’uomo.
Per non dire dei cetrioli,/ degli affari fuori del normale,/ e io ho creduto poco dopo,/ di trovarmi in un sexi shop.
Quando ho visto delle belle pere,/ non so se finte o vere,/ le ho toccate appena appena,/ che ha suonata la sirena.
Si fa vivo il Padre Eterno,/ che mi dice: vuoi star fermo!/ il tuca tuca non lo fai,/ qui dove sono io.
Sono rimasto interdetto,/ così che io gli ho detto,/ sono qui solo per vedere,/ San Pietro può far fede!
Vi faccio dei gran complimenti,/ per quello che avete piantato,/ una domanda mi tocca farla,/ come mai questa roba bella?
Adopero della merda schietta,/ gliela butto con la secchia,/ questa è roba bio,/ giusta per l’orto di Dio.
Le mie piante mi guardo bene,/ di tirarle su coi veleni,/ non faccio come fanno in terra,/ che concimano con la porcheria.
Adesso carino torna giù,/ e dì loro come quassù,/ siamo capaci di concimare,/ che han tutto da imparare.
