Tla vita j’an i galòpa,
e nun ai stém sla gròpa,
grapèd ma la crignéra,
per nu caschè ma tèra.
E’ tèimp s’jan e’ zòga,
u ti bóta s’na fóga,
ch’e’ pèr e’ tir a e’ piatèl,
sè rès-ce d’ nu ciapèl.
Quand t ci znèin it scapa via,
ta ne sé quant ch’i sia,
s’it dmanda quant’ta n’è,
ut täca dì che ta ne sé.
Quand t ci vèć t scap via tè,
si jan purtròp ch’it cór dré,
sè tèimp che l’avènza,
e ma tè pòc ut n’arvènza.
J an sal spàli i pèša tènt,
pjó di sac d’ zimèint,
tai téin só e tai strasèin,
finché al gambi al téin.
J s’ataca e s’incadèina,
finché e’ péš un ti dà pèina,
quand t casc e tan stè só,
e vò dì che tan n’è pjó.
T an vurès d’jèltre incóra,
mo quand l’ariva la tu óra,
l’arlòz us ferma ilé,
e ta n’è pò pjó carghè.
Jan jè pèz dla tu vita,
com i pétal dla margarita,
un sa ch’lelt i véin só,
e’ tót t ‘na vòlta i casca zó.
Ivano Aurelio Muratori
ARRIVA UN ALTRO ANNO
Nella vita gli anni galoppano,/ e noi ci stiamo in groppa,/ aggrappati alla criniera,/ per non cadere a terra.
Il tempo con gli anni gioca,/ te le butta con una foga,/ che pare il tiro al piattello,/ con il rischio di non prenderlo.
Quando sei piccolo ti scappano via,/ non lo sai quanti siano,/ se ti domandano quanti ne hai,/ ti tocca dire che non lo sai.
Quando sei vecchio scappi via tu,/ con gli anni purtroppo che ti corrono dietro,/ con il tempo che avanza,/ e a te ne rimane poco.
Gli anni sulle spalle pesano tanto,/ più dei sacchi di cemento,/ li tieni su e li trascini,/ finché le gambe tengono.
Si attaccano e si incatenano,/ finché il peso non ti dà pena,/ quando cadi e non stai su,/ vuol dire che non ne hai più.
Ne vorresti degli altri ancora,/ ma quando arriva la tua ora,/ l’orologio si ferma lì,/ e non lo puoi più caricare.
Gli anni sono pezzi della tua vita,/ come i petali della margherita,/ uno con l’altro vengono su,/ e tutto in una volta cadon giù.
