La mi möj per stè tranquéla,
la va ‘venti a capuméla,
dó tré tazi cume nòrma,
sina la diš ch’lan dòrma.
Nunustènt ch’la sia tènta,
dal vòlti lan s’indurmèinta,
e la tò per fè la nana,
vint gòzli ad valèriana,
S’ènca quèla lan gni fà,
e’ rimèdie la l’à zà,
la tišana Pumpadur,
isé la dòrma sicur.
Mè ò da stè sna da véda,
e’ prighè perché la zéda,
per fei ciapè sòbti són,
ai faz la faza da tòn.
La ciud jéćć ‘pèina còta,
sèinza dém la bòna nòta
lan mi fà nisun dispèt,
sna ch’um täca mètla a lèt.
Per andè só per la schèla,
u mi vuria la barèla,
inveci um täca tóla in braz,
ch’l’è sèimpre un strapaz.
Tènimòdi a n’ò chèra,
da lasèla ilé ma tèra,
stèša sóra e’ mermur giaz,
un šghèrb che mè an gni faz.
Te lèt la dòrma tót la nòta,
èltreché una marmòta,
e mè ilé a guardè,
ch’lan s’ava da švigè.
Per féla arvè ma la matèiina,
a prèg la madunèina
sa tót quèl ch’l’à bót zó
magara lan si svègia pjó.
Ivano Aurelio Muratori
VA AVANTI A CAMOMILLA
Mia moglie per stare tranquilla,/va avanti a camomilla,/ due tre tazze come norma,/ se no dice che non dorme.
Nonostante che sia tanta,/ a volte non si addormenta,/ e prende per far la nanna,/ venti gocce di valeriana.
Se anche quella non le fa,/ il rimedio ce l’ha già,/ la tisana Pompadur,/ così dorme di sicuro.
Io devo stare solo a vedere,/ e pregare perché ceda,/ per farle prendere subito sonno,/ le faccio la faccia da tonno.
Chiude gli occhi appena cotta,/ senza darmi la buona notte,/ non mi fa nessun dispetto,/ solo che mi tocca metterla a letto.
Per andare su per la scala,/ mi ci vorrebbe la barella,/ invece mi tocca prenderla in braccio,/ che è sempre uno strapazzo.
Tanto non ho piacere,/ di lasciala lì per terra,/ stesa sopra il marmo freddo,/ uno sgarbo che io non le faccio.
Nel letto dorme tutta la notte,/ altro che la marmotta,/ e io lì a guardare che non si debba svegliare.
Per farla arrivare alla mattina,/ prego la Madonnina,/ con tutto quello che ha buttato giù,/ magari non si sveglia più
