La suvranità alimèntèra,
m’una mèstra éléméntèra,
cum ch’la mi mòj la jè,
a spieghèglia a sò stè mè.
Isé che ma léa a jò dét,
l’è strèn cumè cuncèt,
agl’jè sna du parulòni,
strulghèdi da la Meloni.
Nuvità de centro-dèstra,
l’è la sòlita amnèstra,
in nomèn omen in latèin,
un dét ch’ui stà bèin.
Te stà tranquèla e stá zéta,
ch’l’è tóta èria fréta,
fà da magnè cmè gnint e’ fós,
e va lès s’it diš a bòs!
La regula l’è règida,
la è per Lolobregida,
e’ minèstre cumpètèint,
cus che sa ló d’jalimèint?
Léa alóra la m’à dét:
ai faz incóra i caplét?
o i si fà cumprè zà fat,
ch e’ saria ròba da mat.
Tót al buntà rumagnòli:
la pièda, al castagnòli,
al tajadèli, e i sardun,
agl’jè per tótt o sna per nun?
E a dmand pròpie ma tè,
se adès avèm da magnè,
enca e’ grèl e e’ bagaròun,
che l’Europa las prupòun.
Suvranèsta l’è bèl,
s’us pò magnè inquèl,
se i diš na quèl e na quèst,
mè a fóz via, a faz prèst.
Carèina bona ilé,
e stà da sintì mu mè,
nun a magnèm quel ch’us per,
da suvrèn alimentèr.
Ivano Aurelio Muratori
LA SOVRANITÀ ALIMENTARE
La sovranità alimentare,/ per una maestra elementare,/ come mia moglie è,/ a spiegargliela son stato io.
Così che a lei le ho detto,/ è strano come concetto,/ sono solo due paroloni,/ che ha inventato la Meloni.
Novità del centro-destra,/ è la solita minestra,/ in nomen omen in latèin,/ un detto che ci sta proprio bene.
Tu stai tranquilla e stai zitta,/ che è tutta aria fritta,/ fai da mangiare come niente fosse,/ e vai liscio se ti dicono busso.
La regola è rigida,/ è per Lollobrigida,/ il ministro competente,/ cosa sa lui degli alimenti?
Lei allora mi ha detto,/ li faccio ancora i cappelletti?/ O ce li fanno comperare già fatti,/ che sarebbe una cosa da matti.
Tutte le bontà romagnole,/ la piada, le castagnole,/ le tagliatelle e i sardoni,/ sono per tutti o solo per noi?
E chiedo proprio a te,/ se adesso dobbiamo mangiare,/ anche il grillo e il bacarozzo,/ che l’Europa ci propone.
Sovranista è bello,/ se si può mangiare tutto,/ se dicono no quello no questo,/ io fuggo via, faccio presto!
Carina buona lì,/ e ascolta me,/ noi mangiamo quel che ci pare,/ da sovrani alimentari.
