Ti prim de mélasézént,
Rémin l’à fat e’ monumèint,
me Pèpa Pèvul Quint,
si quatrèin spéš per gnint.
Quèst perché e’ Padre Sènt,
l’éra l’òm pjó putèint,
e la jà fat stè pénsiér,
pr’avè in cambie di piašér.
Perché dal vòlti bšägna ònz,
ma Ló sna stètua in brònz,
fata da un grand artésta,
mèssa in piaza in bèla vésta.
Pròpie te punt céntrèl,
impèt me palaz cumunèl,
pòc da läng da la funtèna,
ch’l’è ‘rvènza fóra mèna.
Pèvul Quint ilà só intrunèd,
s’un pidistal béin iséd,
l’amunès, sè šguèrd sévér,
quij ch’in fà e’ su duvér.
A mèn vérta s’al tré dédi,
e’ bènédès zità e cuntrédi,
che me Pèpa jà fat unór,
cum ch’e’ fós e’ salvatòr.
I l’à camufè da San Gudénz,
che Napuleòun ma ló d’inènz,
a védle sa tènt ad tièra,
u l’avrìa trat zó ma tèra.
Per i rimniš ch’in sa fénz,
da alóra l’è San Gudénz,
tènt Pèvul Quint l’è mòrt,
un la ciapa cume tòrt.
Adès e’ sènt e’ stà ilé,
s’al dèdi vérti tót e’ dé,
per dì ogni matèina,
a quant la va la papalèina.
Ivano Aurelio Muratori
LA STATUA DI PAOLO QUINTO
Nei primi del milleseicento,/ Rimini ha fatto il monumento,/ al Papa Paolo Quinto,/ con soldi spesi per niente.
Questo perché il Padre Santo,/ era l’uomo più potente,/ e gli ha fatto sto pensiero,/ per avere in cambio dei piaceri.
Perché a volte bisogna ungere,/ a Lui con una statua in bronzo,/ fatta da un gran artista,/ messa in piazza in bella vista.
Proprio nel punto centrale,/ davanti al palazzo comunale,/ poco lontano dalla fontana,/ che è rimasta fuori mano.
Paolo Quinto lassù intronato,/ su di un piedistallo ben issato,/ ammonisce, con lo sguardo severo,/ quelli che non fanno il loro dovere.
A mano aperta con le tre dita,/ benedice città e contrade,/ che al Papa han fatto onore,/ come fosse il salvatore.
L’hanno camuffato da San Gaudenzio,/ che Napoleone a Lui dinanzi,/ a vederlo con tanto di tiara,/ lo avrebbe buttato a terra.
Per i riminesi che non sanno fingere,/ da allora è San Gaudenzio,/ tanto Paolo Quinto è morto,/ non la prende come un torto.
Adesso il Santo sta lì,/ con le dita aperte tutto il giorno,/ per dire ogni mattina, a quanto va la papalina.
