La mi ma’, tótt i dé,
al zinc de dòp mèzdé,
fnida l’utma fazènda,
lam féva fè l’ imbrènda.
Però prima lam dmandéva,
cus ch’a dèšidèréva:
pèn, bór e marmèléda,
o pèn òglie sèl e ašèda.
Mè avéva da capè,
sna fra cal dó ròbi ilé,
che s’ui fós stè un parsót,
a me saria magnè tótt.
Tènt ch’ai géva: ma’ fa té!
chèšmaj per nu šbajè,
tót i dó, dai fa la bòna,
ch’ò na fèma buzaróna.
Léa sna muliga d’imbaraz,
lam géva: mo che burdlaz!
e la šbruntléva per la strèda:
u la vò dòlza e salèda!
L’ arivéva dòp d’un po’,
sa tal mèni tót i dó,
pu lam géva, tènt per rid:
sgnór padròun l’è sèrvid!
An féva tèimp a dii grazie ma’,
che j amig im géva: mità!
chi un mòrs e chi un pèz,
e per mè sultènt un mèz.
Mo a séra cuntèint l’istès,
e a n’ò pjó fat, fin adèss,
un’imbrènda isé d’góst,
si amig e i panèin gióst.
Ivano Aurelio Muratori
LA MIA MERENDA DA BAMBINO
La mia mamma, tutti i giorni,/ alle cinque del pomeriggio,/ finita l’ultima faccenda,/ mi faceva far merenda.
Però prima mi chiedeva,/ che cosa desideravo:/ pane burro e marmellata,/ o pane, olio, sale e aceto.
Io avevo da scegliere,/ solo fra quelle due cose lì,/ che se ci fosse stato un prosciutto,/ me lo sarei mangiato tutto.
Tanto che le dicevo: mamma fai tu!/ caso mai per non sbagliare,/ me li porti tutti e due,/ che ho una fame maledetta.
Lei con un po’ d’imbarazzo,/ mi diceva: che bambinaccio!/ e brontolava per la strada:/ la vuole dolce e salata!
Arrivava dopo un po’,/ con nelle mani tutti e due,/ poi mi diceva così per ridere:/ signor padrone è servito!
Non facevo in tempo a dir grazie mamma!/ che gli amici urlavano: metà!/ Chi un morso, chi un pezzo,/ e per me soltanto un mezzo.
Ma ero contento lo stesso,/ non ho più fatto fin adesso,/ una merenda così di gusto,/ con gli amici e i panini giusti!
