U j’ è sla tajadèla,
una bèla sturièla,
‘na fòla sl’ invèntór,
cóg pruvèt d’un sgnór.
E’ mis-cèr ul féva béin
us ciamèva Zafiréin,
e’ lavurèva a Bulógna,
s’u n’è ’na mènzògna.
‘Na matèina ispirèd,
da e’ Signór iluminèd,
u s’è mès da ‘na pèrta
per fè un’ òpra d’èrta.
L’ avéva avù la grèzia,
da véda dòna Lucrèzia,
sa dal bèli tèti tóndi,
e i cavél sal fièzi biòndi.
L’è stè l’infèzna d léa,
a fèi vnì la bèla idèa,
d’ una pasta spècièla,
in mòdi da giubilèla.
Sla farèina e dagl’ jòvi,
dòp una dišèina ad pròvi,
l’à fàt dal fitòci uguèli,
pu ciamèdi tajadèli.
Bulògna sa sta sturièla,
la è per la tajadèla,
l’ ónica ma’ arcnusuda,
quèst per chi us l’è bivuda.
Nu savènd che tla Rumagna,
ui n’è una cumpagna,
magara ènca pjó bèla,
sa èssa ma’ dla tajadèla.
T ‘na chèša ad cuntadèin,
tra Rémin e San Marèin,
un’azdóra sal surèli,
al fašét al tajadèli.
L’an prèciš un si sa,
us pò dì zinczèint an fà,
de fàt u s’à mèmòria,
mo un gn’è ti libre ad stòria.
Agl’ jàzdóri a quant ch’e’ pèr,
agl’ jà scrét se tulèr,
la rizèta sgänd la quèla,
al fašét la tajadèla.
Agl’jà las cume pròvi,
un mòć ad còzli d’òvi,
al tajadèli ciuši a nid,
e una fòla ch’la fà rid.
Ivano Aurelio Muratori
LA FAVOLA DELLE TAGLIATELLE
C’è sulla tagliatella,/ una bella storiella,/ una favola sull’inventore,/ cuoco provetto di un signore.
Il mestiere lo faceva bene,/ si chiamava Zeffirino,/ lavorava a Bologna,/ se non è una menzogna.
Una mattina ispirato,/ dal Signore illuminato,/ si è messo da una parte,/ per fare un’opera d’arte.
Aveva avuto la grazia,/ di vedere donna Lucrezia,/ con delle belle tette tonde,/ e capelli con ciocche bionde.
È stata l’immagine di lei,/ a fargli venire la bella idea,/ di una pasta speciale,/ in modo da giubilarla.
Con la farina e delle uova,/ dopo una decina di prove,/ ha fatto delle fettucce uguali,/ poi chiamate tagliatelle.
Bologna con questa storiella,/ è per la tagliatella,/ l’unica mamma riconosciuta,/ questo per chi se l’è bevuta.
Non sapendo che in Romagna,/ ce n’è una uguale,/ magari anche più bella,/ con essa mamma della tagliatella.
In una casa di contadini,/ fra Rimini e San Marino,/ una azdora con le sorelle,/ fecero le tagliatelle.
L’anno preciso non si sa,/ si può dire cinquecento anni fa,/ del fatto si ha memoria,/ ma non è scritto nei libri di storia.
Le azdore a quanto pare,/ hanno scritto sul tagliere,/ la ricetta secondo la quale,/ fecero le tagliatelle.
Hanno lasciato come prove,/ un mucchio di gusci di uova,/ le tagliatelle chiuse a nido,/ e una favola che fa ridere.
