La Pasqua sèimpre bèla,
sl’uvin e sla zambèla,
e sna sènta claziòun,
da fè gòd un luvaciòun.
Nujèlt a la fém incóra,
énca óz cumè alóra,
e a Pasqua la matèina,
as truvém tla cušèina.
Tót a dì bònazurnèda,
s’un bèš e un’abrazèda,
e dòp tré quatre uraziòun,
a dém córs ma la claziòun.
Sal gl’ jòvi bènèdéti,
la zambèla in tènti fèti,
e’ salèm quèl fat at chèsa,
per ‘na Pasqua in sènta pèsa.
La bèrca la jà la véla,
e la Pasqua la zambèla
e sèinza quèla ch’ilé,
la saria cmè tòt i dé.
Ringraziand e’ Signurèin,
ai varzém ‘na bocia ad vèin,
na quèl da cumbatimèint,
che pjó bòn: e’ vèin sènt!
L’ òv dur l’è spécèl,
s’una muliga ad sèl,
ad pévur mènc d’un crèj,
sèinza l’è ènca mèj.
E’ salèm che cašalèin,
fat si lardèl fèin fein,
afitèd sla curtèla,
e magnèd sla zambèla.
U jè ènca la pagnòta,
da magnè cun l’arcòta,
s’una gòzla ad mièl:
un ènt stupènd dólz pasquèl!
La Pasqua la vò isé,
sa stal ròbi da magnè,
sgänd la nòsta tradiziòun
ch’lan s’vpò pèrd da bòn.
Èsènd quèsta la manira,
per sintì la Pasqua véra,
ch’la n’à gnint ad nòv,
zambèla, vèin, salèm un òv.
Ivano Aurelio Muratori
LA COLAZIONE PASQUALE
La Pasqua sempre bella,/ con l’ovino e la ciambella,/ e con una santa colazione,/ da far godere un golosone.
Noi la facciamo ancora,/ anche oggi come allora,/ e a Pasqua la mattina,/ ci troviamo in cucina.
Tutti a dir buona giornata,/ con un bacio e un abbraccio,/ e dopo tre o quattro preghiere,/ diamo corso alla colazione.
Con le uova benedette,/ la ciambella in tante fette,/ il salame quello fatto in casa,/ per una Pasqua in santa pace.
La barca ha la vela,/ e la Pasqua la ciambella,/ e senza quella lì,/ sarebbe come tutti i giorni.
Ringraziando il Signore,/ gli apriamo una bottiglia di vino,/ non quello da combattimento,/ quello più buono: il vin santo!
L’ uovo duro è speciale,/ con un pochino di sale,/ di pepe poco poco,/ e senza è anche meglio.
Il salame quello casereccio,/ fatto coi lardelli fini fini,/ affettato con la coltella,/ e mangiato con la ciambella.
C’è anche la pagnotta,/ da mangiare con la ricotta,/ con sopra una goccia di miele:/ un altro stupendo dolce pasquale.
La Pasqua vuole così,/ con queste cose da mangiare,/secondo la nostra tradizione,/ che non si può perdere davvero.
Essendo questa la maniera,/ per sentir la Pasqua vera,/ e senza niente di nuovo,/ ciambella, vino, salame, un uovo.
