Dasdé sóra la šbanzóla,
la burdlina la spindòla,
las mòv e la fà biriènda,
suspéša sóra l’ända.
La s’èlza só te zél,
la vòla cmè e’ cuchèl,
zà che agl’jèli lan li à,
lai dà vòsca la su ma’.
E léa la fà, per vulè,
só e zó,avènti indré,
cmè e’ pendul dl’arlòz,
s’al manini in apòz.
D’insó la ciapa vèla,
inzò la va ch’la pèla,
la cór cmè una sajèta,
sla ma ch’la spènz da säta.
Per arcòi béin la spinta,
la tira fóra tót la grinta,
e sal brazi la fà fòrza,
perché e vòl un si šmòrza.
Per mantnì la dirèziòun,
la fà s’al gambi e’ timòun,
in mòdi che la šbanzóla,
lan s’invròcia e lan fróla.
Sna manina vers e’ zél,
la fà mòsa da ciapèl,
l’an gne la fà per pòc,
l’arpròva te zir dòp.
Quand ch’ la stà per caschè,
u jè la ma’ ilé dré,
un gnè vèrs ch’la la mòla,
e la fèrma la šbanzóla.
Ivano Aurelio Muratori
LA BAMBINA SULL’ALTALENA
Seduta sull’altalena,/ la bambina penzola,/ si muove, e volteggia,/ sospesa sull’onda.
Si alza su nel cielo,/ vola come il gabbiano,/ giacchè le ali non le ha,/ le dà velocità la mamma.
E lei fa, per volare,/ su e giù, avanti e indietro,/ come il pendolo dell’orologio,/ con le mani in appoggio.
D’insù prende vela,/ d’ingiù va che pèla,/ corre come una saetta,/ con la mamma che spinge da sotto.
Per raccogliere bene la spinta,/ tira fuori tutta la grinta,/ e con le braccia fa forza,/ perché il volo non si freni.
Per mantenere la direzione,/ fa con le gambe il timone,/ in modo che l’altalena,/ non si attorcigli e non frulli.
Con una manina verso il cielo,/ fa la mossa di prenderlo,/ non c’è la fà per poco,/ ci prova nel giro dopo.
Quando sta per cadere,/ c’è la mamma lì vicino,/ non c’è verso che la molli,/ e ferma l’altalena.
