E’ Signòr l’è stè gègnèl,
u s’à fat un mänd tènt bèl,
e us l’à dè, ‘na vòlta fnìd,
sl’impègn da tnìl pulid.
U n’à dét gnint ad prèciš,
a riguèrd de paradiš,
la rašòun per la quèla,
e’ putria ès iqué sla tèra.
L’óm l’è fat isé,
me Signór u jà dét sé,
pu l’à fat quèl ch’ui pèr,
e dla tèra un mundizèr.
Mèrda e’ ròsc dimpartòt,
pòc impòrta se e’ stà brót,
dla mundèza us ne frèga,
tènimòdi ló u la pèga.
Incóra ló u ne sa,
cus ch’l’è la ziviltà,
s’un tèin e’ mänd pulid,
us dà la sapa si pid.
Un pò fè tèra brušèda,
èria frèida e aqua inquinèda,
ma j’anvud cušè cui lasa?
gnènca e’ lègn per fè la casa!
Bšägna che us ciapa cura,
ad tót quanta la natura,
dl’ambiént e dla tèra,
e spazè vi’ la purchèra.
L’à da cór e fè prèst,
pòc tèimp u jè rèst,
e ch’un dèga pu a ba’ mòrt:
vè! an me ne séra incórt.
Ivano Aurelio Muratori
L’UOMO, QUELLO SPORCACCIONE!
Il Signore è stato geniale,/ ci ha fatto un mondo tanto bello,/ ce l’ha dato, una volta finito,/ con l’impegno di tenerlo pulito.
Non ha detto niente di preciso,/ a riguardo del paradiso,/ la ragione per la quale,/ potrebbe essere qui sulla terra.
L’uomo è fatto così,/ al Signore gli ha detto sì,/ poi ha fatto quel che gli pare,/ e della terra un immondezzaio.
Merda e spazzatura dappertutto,/ poco importa se sta brutto,/ dell’immondizia se ne frega,/ tanto lui la paga.
Ancora lui non lo sa,/ cos’è la civiltà,/ se non tiene il mondo pulito,/ si dà la zappa sui piedi.
Non può fare terra bruciata,/ aria fradicia e acqua inquinata,/ ai nipoti cosa ci lascia?/ neanche il legno per far la cassa!
Bisogna che si prenda cura,/ di tutta quanta la natura,/ dell’ambiente e della terra,/ e spazzar via l’immondizia.
Deve correre e far presto,/ poco tempo gli resta,/ che non dica poi a babbo morto,/ vè! non me n’ero accorto.
