Una piaza sèinza pizun,
an l’augur ma nisun,
ui mancaria un suchè,
cmè un bagn sèinza bidè.
E’ pizòun per fét la fèsta,
ut la pò fè s’la tèsta,
l’è cuncim ch’e’ fà bèin,
u n’è chèš da fè cašèin.
E’ vèin a bichè tal mèni,
ui pièš da fè al šmègni,
e’ dmanda la carità,
e pu e’ magna quel ch’j dà.
I fà biriènda só té zél,
pu is fèrma si davanzèl,
i s’arpònsa sóra i còp,
isé un s’véd ch’ jè tróp.
Tla piaza de cumun,
u jè sèimpre stè i pizun,
j cuntòrna i munumèint,
nunustènt qualche lamèint.
Mèintre a tòg e’cafè,
um pièš a védie ilé,
se tavulèin ch’ i švulaza,
e i mèt la tèsta tla taza.
E’ pizòun u n’è cativ,
quii ch’i diš ch’e’ fà schiv,
jà un prublèma sl’ušèl,
mo purtròp u jè ènca quèl.
Un s’pò dì che e’ pizòun,
e’ sia un spurcaciòun,
cume tót j èser vivèint,
u la šmöla dògnitènt.
S’una complicaziòun,
sicòm ch’u n’à padròun,
che sè sachèt u la tò só,
is la ciapa pu sa ló.
Mo ló u n’è e’ demògni,
l’è prutèt da Sant’Antòni,
e’ stà bèin du ch’l’è,
fè un piašer lasèl stè!
Ivano Aurelio Muratori
I PICCIONI STANNO BENE DOVE SONO
Una piazza senza piccioni,/ non la auguro a nessuno,/ le mancherebbe qualcosa,/ come un bagno senza bidè.
Il piccione per farti la festa,/ te la può fare sulla testa,/ è concime che fa bene, / non è il caso di fare casino.
Viene a beccare nelle mani,/ gli piace di fare le smanie,/ chiede la carità,/ e poi mangia quel che gli danno.
Volteggiano su nel cielo,/ poi si fermano sui davanzali,/ si riposano sui coppi,/ così non si vede che son troppi.
Nella piazza del Comune,/ ci son sempre stati i piccioni,/ contornano i monumenti,/ nonostante qualche lamento.
Mentre prendo il caffè, / mi piace vederli lì,/ sul tavolino che svolazzano,/ e metton la testa nella tazza.
Il piccione non è cattivo,/ quelli che dicono che fa schifo,/ hanno un problema con l’uccello,/ ma purtroppo c’è anche quello.
Non si può dire che il piccione,/ sia uno sporcaccione,/ come tutti gli esseri viventi,/ la molla ogni tanto.
Con una complicazione,/ siccome non ha il padrone,/ che col sacchetto la raccoglie,/ se la prendono con lui.
Ma lui non è il demonio,/ è protetto da Sant’Antonio,/ lui sta bene dòv’ è,/ fate un piacere,/ lasciatelo stare!
