A jò dét: ciò bèla réza,
per staséra fàm ‘na péza,
e famla bèin carghèda,
nu ciapla per ‘na pièda.
A vrìa la quatre stašòun,
se parsót, e’ pivaròun,
tré scarciuflin e pu tai mèt,
agl’julivi e di funghét.
Sa parèćia muzarèla,
e una fèta ad murtadèla,
e’ pumidòr san marzèn,
e qualche fèta ad salèm.
La m’à dét sla gnòla,
an sò una pizaiòla,
mo at la faz vulèntiér,
ènc se a sò ti pénsiér,
Tót cla ròba an gne la mèt,
l’è ‘na péza na un brudèt,
ui mènca sna un ravanèl,
e pu ta jè mès inquèl.
Ènziché tót cla purchèra,
mè at faz la marinèra,
sl’aj, paršèmul, pumidòr,
ch’u jè ènca mènc lavór.
An capès a jó dét mè,
cus ch’ui sia maj da fè,
per mètie un pógn d ròba,
e la m’à inciurlì sla bòba.
La m’àrspost: té di pò,
mè cla ròba an la jò,
um dispièš, um rincrès,
e nu dìm famla listès.
Dòp al su impuntèdi,
a io dét: réza fam du pièdi,
e se ènca quèst ut còsta,
va a tò quèli tla bòsta.
Ivano Aurelio Muratori
FAMMI UNA PIZZA!
Le ho detto: dì bella riccia,/ per stasera fammi una pizza,/ e fammela ben carica,/ non prenderla per una piada.
Vorrei la quattro stagioni,/ con prosciutto e peperone,/ tre carciofini e poi ci metti,/ le olive e dei funghetti.
Con parecchia mozzarella,/ e una fetta di mortadella,/ il pomodoro San Marzano,/ e qualche fetta di salame.
Mi ha detto lagnandosi,/ non sono una pizzaiola,/ te la faccio volentieri,/ anche se sono nei pensieri.
Tutta quella roba non ce la metto,/ è una pizza non un brodetto,/ ci manca solo un ravanello,/ che dopo ci hai messo tutto.
Anziché tutta quella porcheria,/ io ti faccio la marinara,/ con l’aglio, il prezzemolo e pomodoro,/ che c’è anche meno lavoro.
Non capisco le ho detto io,/ cosa ci sia mai da fare,/ per metterci un pugno di roba,/ e mi ha invornito col chiasso.
Mi ha risposto: tu dì pure,/ io quella roba non ce l’ho,/ mi dispiace, mi rincresce,/ e non dirmi fammela lo stesso.
Dopo le sue impuntate,/ le ho detto: riccia fammi due piade,/ e se anche questo ti costa,/ va a prendere quelle nella busta.
