E’ cachi èrbur cinèš,
e’ fà ènca té nòst paèš,
in zità e tla campagna,
l’è e’ Loto ad Rumagna.
Un si pò capì perché,
iqué i ne cèma isé,
e’ cachi e’ piès ad pjó,
mej per nun e’ mej per ló.
Gròs cmè ‘na partugala,
cun la boza arènz e zala,
l’è un frót dna bèlèza,
aprèzèd per la dulcèza.
Pjó dòlz ènca de mlòun,
la mana de luvaciòun,
s’u n’è fat us sèint,
zà ch’e’ lapa e e’ liga i dèint.
La pòlpa ch’la sfilaza,
la s’ataca tla faza,
da la bäca fina e’ nèš,
un si pò nu šbruvaldès.
E’ cachi quand l’è fat,
u s’adèša se piat,
ui vò grèzia té punsèl,
pu us taja sè curtèl.
Per magnèl us fà tènt bèin,
s’us dròva e’ cuciarèin,
esènd cóv e’ pò tò só,
la pòlpa ch’lan còla zó.
A guàj la furzèina,
che e’ cachi u s’arvèina,
u n’è la pasta sóta,
us véd po ch’l’è fróta.
Ui vuria e’ bavušèin,
mo s’ a sì un figarèin,
per puliv mèni e muš,
e’ tvajòl e’ fà st’uš.
Ivano Aurelio Muratori
ELOGIO DEL CACO
Il caco albero cinese/ cresce anche nel nostro paese,/ in città e nella campagna,/ è il Loto di Romagna.
Non si può capir perché,/ qui non lo chiamino così,/ il caco piace di più,/ meglio per noi e meglio lui.
Grosso come un’arancia,/ con la buccia arancione e gialla,/ è un frutto di una bellezza,/ apprezzato per la dolcezza.
Più dolce anche del melone,/ la manna del golosone,/ se non è maturo si sente,/ già che allappa e lega i denti.
La polpa che sfilaccia,/ si attacca alla faccia,/ dalla bocca fino al naso,/ non si può non sbrodolarsi.
Il caco quando è fatto,/ si adagia sul piatto,/ ci vuole grazia nel posarlo,/ poi si taglia col coltello.
Per mangiarlo si fa tanto bene,/ se si adopera il cucchiaino,/ essendo concavo, può prender su,/ la polpa che non cola giù.
Guai la forchetta,/ che il caco si rovina,/ non è la pastasciutta,/ si vede pure che è frutta.
Ci vorrebbe il bavaglino,/ ma se siete un figarino,/ per pulirvi mani e faccia,/ il tovagliolo fa quest’uso.
