E’ zacabdòć per un chènt,
u n’è pròpie ignurènt,
l’à fat al scòli, qualche córs,
e l’é bòn da fè un zcórs.
L’è un filòšòf nichilèsta,
e’ nèga tótt ma la vésta,
e’ fà di stramb rašunamént,
ch’i fà acqua da tót i chènt.
Per zunta l’è un tèstèrd,
un mòla, un lasa pèrd,
un zéd gnènca s’ta l’amaz,
l’è pròpie un rompicaz.
L’arbàt tót’ al paròli,
cmè e’ calzulèr sal sòli,
cmè e’ fabre e’ fà sè fèr,
per dì pu quèl ch’ui pèr.
L’insèst, bat che te bat,
sna per fè dvèintè mat,
isé che per da véda,
mazè i bdéć sal déda.
Quand ch’u s’è dè rašòun,
e’ ciùd la discusiòun,
un gn’ impòrta se l’à tòrt,
mazè i bdéć l’è e’ su fòrt.
Stai diš basta, vat a mòra,
un sint e e’ luta incóra,
per tnì la bäca ciùša,
bšägna ch’j la cuša.
Sa tót al ròbi e’ punta i pì,
e un s’capès sl’à capì,
tènimèdi ló l’ataca,
e’ zacabdòć l’è un pataca.
Ivano Aurelio Muratori
LO SCHIACCIAPIDOCCHI
Lo schicciapidocchi per un verso,/ non è proprio ignorante,/ ha fatto le scuole, qualche corso,/ ed è capace di fare un discorso.
È un filosofo nichilista,/ e nega tutto alla vista,/ fa degli strambi ragionamenti,/ che fanno acqua da tutte le parti.
Per giunta è un testardo,/ non molla, non lascia perdere,/ non cede neanche se lo ammazzi,/ è proprio un rompicazzo.
Ribatte tutte le parole,/ come il calzolaio con le suole,/ come il fabbro fa col ferro,/ per dire poi quel che gli pare.
Insiste, batti che ribatti,/ solo per far diventar matti,/ così che sembra di vedere,/ uccidere i pidocchi con le dita.
Quando si è dato ragione,/ chiude la discussione,/ non gli importa se ha torto,/ ammazzare i pidocchi è il suo forte.
Se gli dici basta, vai a morir amazzato,/ non sente e continua ancora,/ per tener la bocca chiusa,/ bisogna che gliela cuciano.
Su tutte le cose punta i piedi,/ e non si capisce se ha capito,/ tanto lui attacca,/ lo schiacciapidocchi è un pataca.
.
