Mè a jò per e’ nòst Dòm,
una gran amiraziòun,
isé maèstòš, isé bèl,
ch’an fnès maj da guardèl.
Òpra d’èrt ad finèza,
la inchènta per la blèza,
prudig d’architètura,
tènt drèinta quant ad fóra.
Stè bèl témpie us l’intèsta,
Sigišmänd Malatèsta,
fat per ló da l’Albèrti,
architèt, mèstre d’èrti.
Cun e’ témpie finalmèint,
e’ nas e’ rinasimèint,
ch’l’arciapa a la luntèna,
l’architètura rumèna.
Simbèin ‘na maravèja,
mal ciši un s’asurmèja,
per jurnamèint e i decör,
il cèma Tèmpie dl’ Amór.
L’è dèdichéd me Signór,
na ma l’èser supèriór,
mo ma ló sgnór dla zità,
a la faza dl’umiltà!
Drèinta u j’è sé capèli,
sà da gl’jòpri pròpie bèli,
sal scrèti fati da tänd,
Išòta e Sigišmänd.
Tachèd m’una paréda,
u j’è un afrès-c da véda,
un òpra zingantèsca,
pitòr: Pier dla Franzèsca!
Sa Malatèsta in prighièra,
a mèn zunti e znèć ma tèra,
davènti a San Sigišmänd,
ch’ul prutèz da i mèl de mänd.
J diš che e’ dòm l’è fat isé,
perché us l’è fat per sé,
l’à fat quèl ch’l’èra gióst,
e ch’l’avéva zà fat Augóst.
Mo adèss us pò dì ch’l’è,
la pjò bèla ciša d’iqué,
i la vèin a véda da tòtt e’ mänd
e i diš grazie ma Sigišmänd.
Ivano Aurelio Muratori
IL TEMPIO DELL’AMORE
Io ho per il nostro Duomo,/ una grande ammirazione,/ così maestoso, così bello,/ che non finisco mai di guardarlo.
Opera d’arte di finezza,/ incanta per la bellezza,/ prodigio d’architettura,/ tanto dentro quanto di fuori.
Questo bel tempio se lo intesta,/ Sigismondo Malatesta,/ fatto per lui dall’Alberti,/ architetto e maestro d’arte.
Con il tempio finalmente,/ nasce il Rinascimento,/ che riprende alla lontana,/ l’architettura romana.
Sebbene una meraviglia,/ alle chiese non assomiglia,/ per gli ornamenti e i decori,/ lo chiamano Tempio dell’Amore.
È dedicato al Signore,/ non all’essere superiore,/ ma a lui signore della città,/ alla faccia dell’umiltà!
Dentro ci sono sei cappelle,/ con delle opere proprio belle,/ con le scritte fatte attorno,/ Isotta e Sigismondo.
Attaccata a una parete,/ c’è un affresco da vedere,/ un’opera gigantesca,/ pittore: Piero della Francesca!
Con Malatesta in preghiera,/ a mani giunte e inginocchiato,/ davanti a San Sigismondo,/ che lo protegge dai mali del mondo.
Dicono che il Duomo sia fatto così,/ perché se l’é fatto per sè,/ ha fatto quello che era giusto,/ e che aveva già fatto Augusto.
Ma adesso si può dire che è,/ la più bella chiesa di qui,/ la vengono a vedere da tutto il mondo,/ e dicono grazie a Sigismondo.
