Me rimnéš ui pièš cór,
se féšic da curidór,
un pò stè fèrme e da sdé,
ló purtròp l’è fat isé.
E’ va a cór ògni matéina,
sla spiagia zó a maréina,
dré ma gl’jändi e i chuchèl,
u n’avria un pòst pjó bèl.
Pu e’ lavóra tót e’ dé,
us fà fadiga a stèi dré,
e vacfòrt ui dà drèinta,
se pèz un s’indurmèinta.
Un si pò truvè un spòrt,
duvè ch’ un vaga fòrt,
l’è prim o l’è šgänd,
sinènt campiòun de mänd.
Qualunque mèz ul fà cór,
da e’ carèt fin e’ mutór,
tót quel ch’l’à ul manda,
da la Ferari ma la Panda.
E còr drè mal dòni bèli,
l’à na pasiòun per quèli,
e còr finché un li ciapa,
tènimòdi lin gni scapa.
E mänd us n’è incórt,
che e’ rimnéš e’ viaza fòrt,
e quand ch’l’è in pèsta
e’ fà e’ fóm per ès in tèsta.
E’ va fòrt ènca te lèt,
in grèd da fén sé o sèt,
li n’è ciacri mo fat,
ma ló nisun ul pò bat.
Ivano Aurelio Muratori
IL RIMINESE VA FORTE
Al riminese gli piace correre,/ col fisico da corridore,/ non può stare fermo e seduto,/ lui purtroppo è fatto così.
Va a correre ogni mattina,/ sulla spiaggia giù a marina,/ dietro alle onde e ai gabbiani,/ non avrebbe un posto più bello.
Poi lavora tutto il giorno,/ si fatica a stargli dietro,/ va forte ci dà dentro,/ sul pezzo non si addormenta.
Non si può trovare uno sport,/ dove non vada forte,/ è primo o secondo,/ fintanto campione del mondo.
Qualunque mezzo lo fa correre,/ dal carretto fino al motore,/ tutto quello che ha lo manda,/ dalla Ferrari alla Panda.
Corre dietro alle donne belle,/ ha una passione per quelle,/ corre finché le prende,/ tanto non gli scappano.
Il mondo se n’è accorto,/ che il riminese viaggia forte,/ e quando è in pista,/ fa il fumo per essere in testa.
Va forte anche nel letto,/ in grado di farne sei o sette,/ non son chiacchiere ma fatti,/ a lui nessuno lo può battere.
