Tènt per dì la tajadèla,
mè a la magn tla padèla,
zà ch’la fá pjó rinsìda,
e la è pjó sapurida.
‘Na manira šgrazièda,
ch’la n’è zèrt da véda,
una ròba da tavèrni,
e per òmne dal cavèrni.
Per fè un lavurèt bèinfat,
la s’à da magnè té piat,
cumè ch’i fà tót i zivil,
ugn’è gnènca bšägn da dìl.
I piat ušèd int’ e’ mänd,
jè pièn o sina fänd,
la tajadèla la dipènd,
da quant e’ piat e’ rènd.
Ed èsa, la puràza,
int e’ piat pièn las giaza,
e quand ch’lan sguèla pjó,
l’è dura a tóla só.
Mèintre invèce int e’ piat cóv,
cmè it tla mèt ta la tròv,
la rèsta pjó amucèda,
chèlda e bèin radanèda.
Ilé drèinta lan si pèrd,
e e’ calór un si dispèrd,
la n’è tóta šmanèda,
e in zir te piat sparguièda.
Cmè ti piat di risturènt,
adiritura gighènt,
sa tré quatre tajadèli,
difizil ènca truvèli.
Dònca sèinza dubitè,
la tajadèla la à d’andè,
impiatèda te piat fänd,
che pièn l’è per e’ šgänd.
Ivano Aurelio Muratori
IL PIATTO DELLA TAGLIATELLA
Tanto per dire la tagliatella,/ io la mangio nella padella,/ già che fa più riuscita,/ ed è più saporita.
Una maniera disgraziata,/ che non è certo da vedere,/ una roba da taverne,/ e per uomini delle caverne.
Per fare un lavoretto benfatto,/ si deve mangiare nel piatto,/ come fanno tutti i civili,/ non c’è neanche bisogno di dirlo.
I piatti usati nel mondo,/ sono piani o se no fondi,/ la tagliatella dipende,/ da quanto il piatto rende.
Ed essa, la poveraccia,/ nel piatto piano si raffredda,/ e quando non scivola più,/ è dura a prenderla su.
Mentre invece nel piatto fondo,/ come te la mettono, la trovi,/ resta più ammucchiata/ calda e ben sistemata.
Lì dentro non si perde,/ e il calore non si disperde,/ non è tutta scomposta,/ e in giro per il piatto sparpagliata.
Come nei piatti dei ristoranti,/ addirittura giganti,/ con tre o quattro tagliatelle,/ difficile anche a trovarle.
Dunque senza dubitare,/ la tagliatella deve andare,/ impiattata nel piatto fondo,/ quello piano è per il secondo.
