Un gn’è dòbiè che mu mè,/ e’ Nadèl um dà da fè,/ un scról d lavór, quèl, quést,/ tót ad cursa per fè prèst.
Ad caplét per i parèint,/ a n’ò da fè quatrezént,/ ò da squartè e’ capòun,/ l’è insäma un lavuròun.
Ch’ò da fè da par mè,/ sla mi möj ilé a guardè,/ s’ la véd ch’a faz fadiga,/ la m’aiuta ‘na muliga.
Um täca adubè la chèša,/ che sina lan si dà pèša,/ ò da mèt al pali e al stèli,/ te salót e zó mal schèli.
Léa inveci zà incazèda,/ la bala sla garnèda,/ la dà e’ straz me sulèr,/ e mè a faz quèl ch’um pèr.
Lam diš ch’j’è lavurtin,/ zà ch’ a scriv i biglitin,/ a mèt la chèrta mi righèl,/ e quèl ch’ a faz l’è fat mèl.
Per cuntantè chi burdlin,/ ai faz prèsépi e èrburin,/ l’é ‘na bèla fadiga,/ sna che lór in capès miga.
S’ai dég dašim ‘na mèna,/ i fà un sac d prubléma,/ mo a ni pòs miga sfurzè,/ tènt ch’a faz tót da par mè.
La vziglia e’ vèin e’ bèl,/ ch’am vist da Bab Nadèl,/ tót räs sla bèrba biènca,/ e per zunta a chènt ènca.
Sta stòria la dura di dé,/ perché pu um täca parcè,/ sèrvì a tèvula i parèint,/ e vèrz al bòci de spumènt.
Tajè a fèti e’ panitòun,/ che da fèl nisun l’è bòn,/ s’an gni fós mè a tajèl,/ e’ saltaria ènca e’ Nadèl.
Quand j’à fnì da magnè,/ um täca ènca sparcè,/ da fél un m’agrèsta,/ simbèin che sia fèsta.
Per finì, cumè ùltme at,/ um täca lavè i piat,/ pu a spaz, a dag e straz,/ e a mand tót a ca de caz.
Ivano Aurelio Muratori
IL NATALE MI DÀ DA FARE!
Non c’è dubbio che a me,/ il Natale dà da fare,/ un sacco di lavori, quello e questo,/
tutto di corsa per presto.
Di cappelletti per i parenti,/ ne devo fare quattrocento,/ devo squartare il cappone,/ è insomma un lavorone.
Che devo fare da solo,/ con mia moglie lì a guardare,/ se vede che faccio fatica,/ mi aiuta un po’.
Mi tocca addobbare la casa,/ che se no non si dà pace,/ devo mettere le palle e le stelle,/ nel salotto e per le scale.
Lei invece già incazzata,/ balla con la scopa,/ dà lo straccio al pavimento,/ e io faccio quello che mi pare.
Mi dice che sono lavoretti,/ già che scrivo i bigliettini,/ metto la carta ai regali,/ e quello che faccio è fatto male.
Per accontentare quei bambini,/ faccio loro presepe e alberino,/ è una bella fatica,/ solo che loro non lo capiscono.
Se dico loro datemi una mano,/ fanno un sacco di problemi,/ ma non li posso mica sforzare,/ tanto che faccio tutto da solo.
La vigilia viene il bello,/ che mi vesto da Babbo Natale,/ tutto rosso con la barba bianca,/ e per giunta canto anche.
Questa storia dura dei giorni,/ perché poi mi tocca apparecchiare,/ servire a tavola i parenti,/ e aprire le bottiglie di spumante.
Tagliare a fette il panettone,/ che di farlo nessuno è capace,/ se non ci fossi io a tagliarlo,/ salterebbe anche il Natale.
Quando hanno finito di mangiare,/ mi tocca anche sparecchiare,/ di farlo non mi dispiace,/ sebbene che sia festa.
Per finire, come ultimo atto,/ mi tocca lavare i piatti,/ poi scopo, dò lo straccio,/ e mando tutti a ca’ del cazzo.
