E’ mi nòn sal mèni d’òr,
e’ féva tótt i lavór,
l’èra sèimpre un spètècul:
un sènt che féva i mirècul!
Ló e’ féva e’ muradór,
e litricèsta, e’ pitór,
l’idraulic, e’ stagnìn,
e’ fabre e l’imbianchìn.
Sna sla sèsta elementèra,
l’à lavurè la tèra,
l’à fat e’ fèruviér,
e il ciamèva tótt inzgnér.
Spès us géva: sèinza ad mè,
vujèlt a v’afughè,
mo a sì int na bóta ad fèr,
tótt i guast ai ripèr.
L’éra e’ pjó brèv di tót,
ad arparè ògni rót,
u n’ ucèda e e’capiva,
cmè fè e quel ch’e’ sèrviva.
A cminzè da i casét,
dal scarani, da i banchét,
pu i mastèl, al bacinèli,
i piat, curtèl e al scudèli.
E’ stapéva e’ gabinèt,
e’ cumdéva i rubinét,
l’indrizéva i ciud stòrt.
Mè ai géva nòn t ci fòrt!
E pu ai féva da garzòun,
sa ma dòs e’ zinalòun,
e stupìd da e’ su èstre,
al ciaméva e’ mi mèstre!
Al guardéva guaši fès,
sla spèrènza ch’um paghès,
tènimòdi a stè ilé,
ui vléva zènt scud e’dé.
Ló um géva t’am pèg té,
dòp quel ch’a t’ ò insgnè,
e che purtròp ta n’impér,
mèj che t faza l’inzgnér!
Ivano Aurelio Muratori
MIO NONNO AGGIUSTAVA TUTTO!
Mio nonno con le mani d’oro,/ faceva tutti i lavori,/ era sempre uno spettacolo,/ un santo che faceva i miracoli.
Lui faceva il muratore,/ l’elettricista, il pittore,/ l’idraulico, lo stagnino,/ il fabbro, l’imbianchino.
Solo con la sesta elementare,/ ha lavorato la terra,/ ha fatto il ferroviere,/ e lo chiamavano tutti ingegnere.
Spesso ci diceva: senza di me,/ voi vi affogate,/ ma siete in una botte di ferro,/ tutti i guasti li riparo.
Era il più bravo di tutti,/ a riparare ogni rotto,/ una occhiata e capiva,/ come fare e quel che serviva.
A cominciare dai cassetti,/ dalle sedie e dai banchetti,/ poi i mastelli, le bacinelle,/ i piatti, coltelli e le scodelle.
Sturava il gabinetto,/ accomodava i rubinetti,/ raddrizzava i chiodi storti./ Io gli dicevo nonno sei il più forte!
E poi gli facevo da garzone,/ con addosso il grembiule,/ e stupito dal suo estro,/ lo chiamavo il mio maestro!
Lo guardavo quasi fisso,/ con la speranza che mi pagasse,/ tanto a star lì,/ ci volevano cinquecento lire al giorno.
Lui mi diceva: mi paghi tu,/ dopo quello che ti ho insegnato,/ e che purtrop- po non impari,/ meglio che tu faccia l’ingegnere!
