Nun a sém d’jaltruèsta,/ a dém la spiagia mi turésta,/ ch’is la gòd per l’instèda,/ dòp ch’is l’à paghèda.
A sém zèinta uspitèla,/ e la spiagia demanièla,/ a la mitém a frót,/ un pzulin al dém ma tótt.
Zà che nun an fém fadiga,/ s’as ritirém una muliga,/ per fè pòst mi bagnènt,/ ch’u n’è ‘na šgrèzia s’jè tènt.
E lór ch’i vènga po,/ ch’i n’à per quant ch’in vò,/ per nujèlt u j’è la palèda,/ ch’as la tném risèrvèda.
E arturném sla riva,/ quand un gn’é alma viva,/ in utóbre, sa tót la còsta,/ ch’l’artòrna a ès la nòsta.
Quand ch’a sém sna nun,/ a la fém da padrun,/ e avém la bèla bagia,/ da gudès tóta la spiagia.
Andém avènti e indré,/ mo an si muvém d’ilé,/ a la guardém da tótt i chènt,/ per arvèdla dòp ad tènt.
A cuntém i pas di pì,/ aspitand chisà ma chi,/ i chuchèl, e’ sól, la séra,/ e i turèsta a primavéra.
Ivano Aurelio Muratori
Noi siamo degli altruisti,/diamo la spiaggia ai turisti,/che se la godono per l’estate,/dopo che ce l’hanno pagata.
Siamo gente ospitale,/e la spiaggia demaniale,/ la mettiamo a frutto,/ un pezzettino lo diamo a tutti.
Giacché noi non facciamo fatica,/ se ci ritiriamo un po’,/ per far posto ai bagnanti,/ che non è una disgrazia se son tanti.
E loro che vengano pure,/ che ne hanno per quanto ne vogliono,/ per noialtri c’è la palata,/ che ce la teniamo riservata.
E ritorniamo sulla riva,/ quando non c’è anima viva,/ in ottobre, con tutta la costa,/ che ritorna ad essere la nostra.
Quando siamo solo noi,/ la facciamo da padroni,/ abbiamo la bella bazza,/ di goderci tutta la spiaggia.
Andiamo avanti e indietro,/ ma non ci muoviamo da lì,/ la guardiamo da tutte le parti,/ per rivederla dopo tanto.
Contiamo i passi dei piedi,/ aspettando chissà chi,/ i gabbiani, il sole, la sera,/ e i turisti a primavera.
