Šgänd ‘na stòria mòlt antiga,
e’ gat nér e’ pòrta sfiga,
mo ch’j l’à strulghèda,
l’à fat ‘na patachèda.
Fòrse e’ sarà perché,
mel’àn fà zó d’ilé,
strèghi e gat d’ògni raza.
ii brušéva viv in piaza,
I cridéva ch’jnsènsèd,
che ló e’ fós indiavlèd,
sl’infèzna de malègn,
se pél nér ch’l’éra e’ sègn.
Ancóra òz ma che nér,
in tènt il guèrda mèl,
si scunzùr per cazèl via,
e si putès il mazaria.
Cumunque sia e’ suzèd
che te scur lo un si véd,
e’ fà scapuzè la zèinta,
che pu dòp las lamèinta.
Quand jè casc ch’imbèzèl,
i diš e’ gat e’ pòrta mèl,
mo qualsiasi gatèra,
la zura ch’u n’è véra.
Insäma ló, per ciud e’ zcórs,
e’ pòrta mèl sna me sórš.
che sicur u ne sparagna,
ul ciapa e pu u se magna.
Se per chèš av l’insugnè,
zughè e zinquèntatré,
che tènimòdi a la fèin,
e’ gat nér e’ pòrta bèin.
Ivano Aurelio Muratori
IL GATTO NERO
Secondo una storia molto antica,/ il gatto nero porta sfiga,/ ma chi l’ha inventata,/ ha fatto una patacata.
Forse sarà perché,/ mille anni fa o giù di lì,/ streghe e gatti di ogi tazza,/ li bruciavano vivi in piazza.
Credevano quegli insensati,/ che lui fosse indiavolato,/ con l’immagine del maligno,/ col pelo nero ch’era il segno.
Ancora oggi a quello nero,/ in tanti lo guardano male,/ con gli scongiuri per cacciarlo via,/ e se potessero lo ammezzerebbero.
Comunque sia succede,/ che nel buio lui non si vede,/ fa inciampare la gente,/ che poi dopo si lamenta.
Quando sono caduti quegli imbecilli,/ dicono il gatto porta male,/ ma qualsiasi gattara,/ giura che non è vero.
Insomma lui, per chiudere il discorso,/ porta male solo al sorcio,/ che sicuro non risparmia,/ lo prende e poi se lo mangia.
Se per caso lo sognate,/ giocate il cinquantatrè,/ che tanto alla fine,/ il gatto nero porta bene.
