Mòlt tèimp fà e’ galèt,
us magnèva si zampét,
i ragujèm, còl e tèsta,
pcòun de prét e crèsta.
Tal budlini l’èra uš,
da fèi pasè drèinta e’ fuš,
‘na vòlta bèin lavèdi,
agl’jéra pu utilizèdi.
E’ galèt immancabilmént,
e’ duvèva ès ad prim chènt,
crisud a fòrza d’ grèn,
ad trida d’érba e pèn.
Us féva a la cazadòra,
te tighèm sla pumidòra,
òglie, lèrd, aj e šmarèin,
e sfumèd sa de bòn vèin.
Us cušèva sal patèdi,
fati a spéc e rušulèdi,
se galèt bèin asurtidi,
da tót e’ rèst insapuridi.
A magnè ‘na ròba isé,
u jéra snà da gudé,
lichès i bafie, abre, dèdi,
ólta agl’jòsi zà pluchèdi.
Òz invèci u jè mènc góst,
de galèt u jè sna e’ bóst,
sa dó còsi pjó dó èli,
chèrna šlévda e dal gran pèli.
Mè al magn tènt per magné,
che pu cativ u n’è,
però gnènca ‘na buntà,
l’è quèl che in fänd u s’à.
Ivano Aurelio Muratori
IL GALLETTO ALLA CACCIATORA
Molto tempo fa il galletto,/ si mangiava con gli zampetti,/ con le rigaglie, collo e testa,/ boccone del prete e cresta.
Nelle budelline era uso,/ farci passare il fuso,/ una volta ben lavate,/ erano poi utilizzate.
Il galletto immancabilmente,/ doveva essere di primo canto,/ cresciuto a forza di grano,/ e la trita di erba e pane.
Si faceva alla cacciatora,/ nel tegame col pomodoro,/ olio, lardo, aglio e rosmarino,/ e sfumato con del buon vino.
Si cuoceva con le patate,/ fatte a spicchi e rosolate,/ col galletto ben assortite,/ da tutto il resto insaporite.
A mangiare una roba così,/ c’era solo godere,/ leccarsi i baffi, labbra e dita,/ oltre alle ossa già piluccate.
Oggi invece c’è meno gusto,/ del galletto c’è solo il busto,/ con due cosce più due ali,/ carne insapore e della gran pelle.
Io lo mangio tanto per mangiare,/ che poi cattivo non è,/ però neanche una bontà,/ è quello che in fondo si ha.
