Per Nadèl un si sparagna,
l’è tót un magna magna,
sa dla ròba prélibèda,
in quantità èšagèrèda.
Dòp Nadèl per nu sciùpè,
un si rèsta che pipè,
a bäca vérta com i pés,
totavi’ un si digèrés.
Is vèin só tót i caplét,
ènca dòp du tré Fernèt,
sa quii as sém impnì,
e adès us täca patì.
E’ pò capitè incóra,
ch’e’ vèin da butè fóra,
e pèrò prima da fèl,
un rimèdie bšägna truvèl.
Per švuitè la pènza pina,
u jè la Citrosodina,
mo sè stömèg custipèd,
u n’è garantid e’ rišultèd.
E un s’è gnènca sicur,
sla tiséna Pompadour,
s’us ne bév ènca ‘na masa,
la custipaziòun lan pasa.
Per favurì la digèstiòun,
u jè e’ cafè sè limòun,
e chèš mai che la tèrda,
la bórsa dl’aqua chèlda.
Dop ch’avém magnè tróp,
e se stömèg èm e’ gróp,
ui vò una limunèda,
sla magnèšia bišurèda.
O una China bulèinta,
che la strèta las šlèinta,
sèinza bšógn da gumitè,
che dop Nadèl un s’pò fè!
Ivano Aurelio Muratori
DOPO NATALE SI PIPPA!
Per Natale non si risparmia,/ è tutto un mangiare,/ con della roba prelibata,/ in quantità esagerata.
Dopo Natale per non scoppiare,/ non ci resta che pippare,/ a bocca aperta come i pesci,/ tuttavia non si digerisce.
Ci vengon su tutti i cappelletti,/ anche dopo due tre Fernet,/ con quelli ci siam riempiti,/ e adesso ci tocca patire.
Può capitare ancora,/ che venga il vomito,/ epperò prima di farlo,/ un rimedio bisogna trovarlo.
Per vuotare la pancia piena,/ c’è la Citrosodina,/ ma con lo stomaco costipato,/ non è garantito il risultato.
E non si è neanche sicuri,/ con la Tisana Pompadour,/ se se ne beve anche tanta,/ la costipazione non passa.
Per favorire la digestione,/ c’è il caffè col limone,/ e caso mai che tardi,/ la borsa dell’acqua calda.
Dopo che abbiamo mangiato troppo,/ e sullo stomaco abbiamo il groppo,/ ci vuole una limonata,/ con la magnesia bisurata.
O una China bollente,/ che la stretta si allenta,/ senza bisogno di vomitare,/ che dopo Natale non si può fare!
