Tènti vòlti a m’imbèrc,
e an m’arcòrd cuš ch’a zérc,
s’ un šmanadèz tutèl,
ch’u m’invròcia e’ zarvèl.
A sfurgat in tót i buš,
an tròv gnint e arvènz deluš,
zérca incóra am dég fra mè,
qualcosa t’è da truvè!
L’è pu una bèla stòria,
ò un calòun dla mèmoria,
tènt ch’an m’arcòrd un caz,
ad quèl ch’a zérc e ch’a faz.
A sfurgat int i casèt,
tra al mudandi e i fazulèt,
per quant ch’a sia cunvint,
che ilé un gni sia gnint.
E quand ch’an tròv nisun quèl,
a m’incaz e am sint mèl,
um va só la prèsiòun,
e a pianz cumè un quajón.
Fin ch’ a ne tròv an stàg béin,
a guèrd ti cumudèin,
tl’armèrie, int e’ cumò,
sa maravèja am dég boh!
Insäma an mi dàg pèša,
e a arbèlt tót la chesà,
epù cuš ch’a zérc, cuš ch’a vòj,
a jè dmand ma la mi möj.
Mo léa lam mèt in imbaraz,
lam dmanda sa ch’juciaz,
s’a m’arcòrd du ch’l’è,
e’ rob ch’us dròva per pisè?
Diš ch’a l’ò da zarchè incóra,
che se dà ch’un scapa fóra,
am la faz tóta madòs,
pòri mè se dà che fós!
Ivano Aurelio Muratori
COSA CERCO?
Tante volte m’imbarco,/ e non mi ricordo cosa cerco,/ con una confusione totale,/ che mi confonde il cervello.
Frugo in tutti i buchi,/ non trovo niente e rimango deluso,/ cerca ancora mi dico fra me,/ qualcosa devi trovare!
È poi una bella storia,/ ho un calo e di memoria,/ tanto che non mi ricordo un cazzo,/ di quello che cerco e che faccio.
Frugo nei cassetti,/ fra le mutande e i fazzoletti,/ per quanto sia convinto,/ che lì non ci sia niente.
E quando non trovo niente,/ m’incazzo e mi sento male,/ mi va su la pressione/ e piango come un coglione.
Finché non la trovo non sto bene,/ guardò nei comodini,/ nell’armadio, nel comò,/ con meraviglia mi dico boh!
Insomma non mi dò pace,/ e ribalto tutta la casa,/ e poi che cosa cerco, che cosa voglio,/ lo chiedo a mia moglie.
Ma lei mi mette in imbarazzo,/ mi domanda con quegli occhiacci,/ se mi ricordo dov’è,/ quell’affare che si adopera per orinare?
Dice che lo devo cercare ancora,/ che se dà che non venga fuori,/ me la faccio tutta addosso,/ povero me se dà che fosse!
