La dmènga, un dé specèl,
a m’arcòrd che da burdèl,
lam paréva tènta bèla,
an féva èlt che ‘spitèla.
A guardéva fés ilé,
té lunèri a pasè i dé,
l’as féva seimpre länga,
per aspitè la dmènga.
La mi ma’ cla matèina,
lam lavéva tla mastlèina,
lam vistìva si pan bòn,
quii dla prima cumignòn.
Epù andéva a la mèsa,
per tnì feda a la prumèsa,
me prét che per bon fè,
mi burdèl ui féva zughè.
Ilé u jéra e’ bigliardèin,
e e’ ping pong da tavulèin,
e pu e’ cino e’ dòpmèzdé,
Stanlio e Ollio, sèinza paghè.
At chèša, sèmèzdé,
u j’éra un sgnór magnè,
dòp e’ Padrènòst,
tajadèli e pól aròst.
A la fèin l’arvèva ilé,
un suntuòš gabarè,
s’un péra ad pasti a tèsta,
per fè pjó bèla la fèsta.
E’ nòn che dé e’ varzéva,
‘na bòcia ch’la spuméva,
us ne déva du déda pròn,
perché l’éra ad che bòn.
La géva la mi nòna,
l’è ‘na grèzia dla Madòna
che la dmènga las täca,
per indulzis la bäca.
E’ dòpmezdé finalmèint,
tótt a spas sla zinczèint,
la famèja tóta drèinta,
da strèt mo cuntèinta.
Ivano Aurelio Muratori
CHE BELLA DOMENICA!
La domenica un giorno speciale,/ mi ricordo che da bambino,/ mi sembrava tanto bella,/ non facevo altro che aspettarla.
Guardavo fisso lì,/ nel lunario a passare i giorni,/ si faceva sempre lunga,/ per aspettare la domenica.
Mia mamma quella mattina,/ mi lavava nella mastella,/ mi vestiva coi panni buoni,/ quelli della prima comunione.
E poi andavo alla messa,/ per tener fede alla promessa,/ al prete che per buon fare,/ ai bambini li faceva giocare.
Lì c’era il biliardino,/ e il ping pong da tavolino,/e poi il cinema il pomeriggio,/ Stanlio e Ollio senza pagare.
A casa a mezzogiorno,/ c’era un signor mangiare,/ dopo il Padre Nostro,/ tagliatelle e pollo arrosto.
Alla fine arrivava lì/ un sontuoso gabarè,/ con un paio di paste a testa,/ per far più bella la festa.
Il nonno quel giorno apriva,/ una bottiglia che spumava,/ ce ne dava due dita per uno,/ perché era di quello buono.
Diceva mia nonna,/ è una grazia della Madonna,/ che a noi ci tocca,/ per addolcirci la bocca.
Il pomeriggio finalmente,/ tutti a spasso con la Cinquecento,/ la famiglia tutta dentro,/ stretta ma contenta.
