S’liv pièš al muntagni èlti,
un gn’è bšägn d’agl’j Èlpi,
ènziché sla Marmolèda,
us pò andè a Scurghèda.
L’è un paèš znèin,
pòst mi pid dl’Apènèin,
s’un mòunt règulèr,
un po’ scòrg, sèinza e’ giazèr.
Un gn’è la funivìa,
tènimòdi un si sia,
u jè sultènt una méta:
andè a spas tla pgnéda.
Us rispira èria sèna,
e un s’è mai vést ‘na frèna,
mo gnènca stachès un sas,
e da in zima arvè da bas.
Ui s’ariva da dó strèdi,
tóti curvi, mo sfaltèdi,
per mèz d’un foristrèda,
l’è pusèbil la scalèda.
Da la piazòla us pò véda,
tóta quanta la valèda,
sè Marècia ch’u la bagna,
e e’ fà bèla la campagna.
L’è un pòst racmandèd,
per i vèćć e i malandèd,
ch’i pò fè dal pasigèdi,
sèinza rès-ce dal caschèdi.
Epù is pò arpunsé,
sal panchini dasdè,
srén, tranquèl, in sènta pèša,
a un tir ad s-ciòp da chèša.
Ivano Aurelio Muratori
ANDATE A TORRIANA
Se vi piacciono le montagne alte,/ non c’è bisogno delle Alpi,/ anziché sulla Marmolada,/ potete andare a Torriana.
È un paese piccolo,/ posto ai piedi dell’Appennino,/ su un monte regolare,/ un po’ scortico, senza il ghiacciaio.
Non c’é la funivia,/ tanto non si scia,/ c’è soltanto una meta:/ andare a spasso nella pineta.
Si respira aria sana,/ e non si è mai vista una frana,/ ma neanche staccarsi un sasso,/ e da in cima arrivare in basso.
Ci si arriva da due strade,/ tutte curve, ma asfaltate,/ per mezzo di un fuoristrada,/ è possibile la scalata.
Dalla piazzola si può vedere,/ tutta quanta la vallata,/ con il Marecchia che la bagna,/ e fa bella la campagna.
È un posto raccomandato,/ per i vecchi e i malandati,/ che possono fare delle passeggiate,/ senza rischio delle cadute.
E poi si possono riposare,/ seduti sulle panchine,/ sereni, tranquilli, in santa pace,/ e a un tiro di schioppo da casa.
