Mè sè culesteròl bas,
a ne schèrt e’ bród gras,
fat sla galèina o e’ capòun,
pin ad stèli e tròp bòn!
Quii ch’i diš ch’l’è pèšènt,
in capès un azidèint,
tót cazèdi, bèli gròsi,
ch’i faza e’ bród s’agl’jòsi!
E’ bród gras al dròv mè,
a me bév cmè cunsommè
e a me faz bèin ristrèt,
per còšie drèinta i caplét.
E’ quèl ch’l’é sèinza gras,
l’é cmè fós fat s’un sas,
s’una sòla, al zèmpi ad pól.
ch’jè sèinza culèsteròl.
Quii ch’i vò fè méj,
il fà sl’òca o sè cunèj,
sè pizòun o sè plit,
ch’e’ vèin ligèr e s-ciavid.
A vòj dì che e’ gras che còla,
mal bächi bòni e’ fà gòla,
e’ lasa sóra e’ palèd
un sapurin dilichèd.
E bród gras l’è la mòrta,
dal mnèstri d’ògni sòrta,
s’lin si coš s’un bròd isé,
l’è guaši mèj lasèli sté.
S’ e’ fós viv e’ mi nòn,
e e’ vidès che de capòun,
us bóta via e’ gras che còla
e ciaparia tla pistòla.
Ivano Aurelio Muratori
NON MI LAMENTO DEL BRODO GRASSO
Io col colesterolo basso,/ non lo scarto il brodo grasso,/ fatto con la gallina o il cappone,/ pieno di stelle e troppo buono.
Quelli che dicono che è pesante,/ non capiscono un accidente,/ tutte cazzate, belle grosse,/ che facciano il brodo con le ossa!
Il brodo grasso lo adopero io,/ me lo bevo come consommè,/ e me lo faccio ben ristretto,/ per cuocerci dentro i cappelletti.
E quello che è senza grasso,/ è come se fosse fatto con un sasso,/ una suola, le zampe di pollo,/ che sono senza colesterolo.
Quelli che vogliono fare meglio,/ lo fanno con l’oca o il coniglio,/ col piccione o col tacchino,/ che viene leggero e insipido.
Voglio dire che il grasso che cola,/ alle bocche buone fa gola,/ lascia nel palato,/ un saporino delicato.
Il brodo grasso è la morte,/ delle minestre di ogni sorta,/ se non si cuociono in un brodo così,/ è meglio lasciarle stare.
Se fosse vivo mio nonno,/ e vedesse che del cappone,/ si butta via il grasso, che cola,/ prenderebbe la pistola.
