Mè a sò nèd té zinquènta,
ò vù e’ nòn cmè badènta,
i mi jéra a lavurè,
ló u m’à fat zughè!
U m’à tnù ti prim pas,
e pu u m’à pòrt a spas,
a pid sla manina strèta,
o sóra la biciclèta.
Um cuntèva quèlca fòla,
e um vniva a tò da scòla,
um purtèva la cartèla,
tótt dó säta un’ umbrèla.
L’éra e’ mèg di zughìn,
e um n’à fat di bilìn:
al bèrchi fati d’chèrta,
un fis-cet sna cana vérta,
un ruchèt ch’e’ zirèva,
un fról d’lègn che prilèva,
as divartimie tótt dó,
sèimpre grazie ma ló.
E pu d’jèlt zóg incóra,
sal manini quèl dla mòra,
si didèn a pèri o gaf,
s’al chèrti a ròbamaz.
Ló um géva e’ zóg l’è bèl,
fin ch’un dvèinta stufarèl,
cmè dì ch’u s’éra stóf,
per nu dimlè d’arbóff.
E mè ai féva sla faza,
la lengua s’na bucaza,
me mi nòn che e’ purèt
da zughè e’ vléva šmèt.
Mo sl’arvanzéva mèl,
ai géva: a sò un burdèl,
a šmitèm, a vag a chèša,
e s’un bèš a fémie pèša.
Ivano Aurelio Muratori
GIOCAVO CON MIO NONNO!
Io sono nato nel cinquanta,/ e ho avuto il nonno come badante,/ i miei erano a lavorare,/ lui mi ha fatto giocare!
Mi ha sorretto nei primi passi,/ e poi mi ha portato a spasso,/ a piedi con la manina stretta,/ o sopra la bicicletta.
Mi raccontava qualche favola,/ e mi veniva a prendere da scuola,/ mi portava la cartella,/ tutti due sotto a un ombrello.
Era il mago dei giochini,/ e me ne ha fatti di giochi:/ le barche fatte di carta,/ un fischietto con una canna aperta,
un rocchetto che girava,/ un frullo di legno che girava,/ ci divertivamo tutti due,/ sempre grazie a lui.
E poi degli altri giochi ancora,/ con le manine quello della mora,/ coi ditini a pari o dispari,/ con le carte a rubamazzo.
Lui mi diceva il gioco è bello,/ finché non stanca,/ come dire che si era stancato,/ per non dirmelo bruscamente.
E io gli facevo sulla faccia,/ la lingua con una boccaccia,/ a mio nonno che poveretto,/ di giocare voleva smettere.
Ma se rimaneva male,/ gli dicevo: sono un bambino,/ smettiamo, vado a casa,/ e con un bacio facevamo pace.
